Таңһчин селәдт интернет орулҗана

21-01-2023, 20:45 | Общество, Таңһчин зәңгс

2022-ч җилин чилгчәр Хальмгин Толһач Хаска Бату Шуд залһлдана йовудт таңһчин улсин олн зүсн сурврмудт хәрү өгсн билә. Тер мет Ик Буурла Чолун Хамр селәнә бәәрн улс эднд Интернет орулхиг сурв. Тодлхас, Шуд залһлдаг арвн хойр миңһн һар күн хәләв, энүнә йовудт ут тоодан миңһн зун һар сурвр таңһчин әмтнәс ирв. Олн зүсн халхар ирсн сурврмудын дунд Интернет орулһна төр кесг дәкҗ давтгдв. Шидр таңһчин Толһачин даалһврар шишлң ведомствсин элчнр Чолун Хамрт ирҗ эн төр яһҗ хаһлҗахиг үнлв.

Өдгә цагт Чолун Хамр селәнд 190 күн бәәнә. Энд мобильн телефоһар күүнддг арһ бәәнә, зуг залһлдан му чинртә гиҗ келх кергтә. Невчкн салькн көдлхлә залһлдан геедрәд, әмтн гериннь дееврт эс гиҗ өндр һазрт һарч телефоһар күүнднә. Нег үлү дунд сурһульд сурчасн арвтнрт интернет эрк биш кергтә болна. Чолун Хамр селәнә дунд сурһулин багш Шарет Удаевин келсәр, сән залһлдан угаһар үрдтән, элгн-садн талан телефоһар җиңнүлхд күнд болна. Өдгә цагт сурһульчнрт интернет угаһар сән чинртә кичәлмүд давулхд бас амр биш, тегәд мана поселкд интернет орулхла бәәдл-җирһл ясрх, сән таал тогтагдх гиҗ багш келнә.
Түрүләд таңһчин кесг селәнд таксофон тәвгдв, түүнә хөөн мобильн залһлдана шишлң станц босхгдв, ода Чолун Хамрт сән чинртә интернет орулхин төлә шишлң кергсл углҗ тәвгдҗәнә, – гиҗ «Ростелеком» ПАО-н Хальмг әңгин һардач Алексей Осипов келв.

Шишлң кергсл экләд көдлхлә, селәнә бәәрн улс «Госуслуги» шаңһа туслмҗин портал олзлҗ чадх, алс-зәәһин эв-арһар давулдг керг-үүлдврмүдт орлцх, онлайн-лавкст эд-тавр хулдҗ авх, смарттелеүзл хәләх болн талдан олн эв-арһта болхмн.

Хальмгин то-дигин делгрлтин министр Алексей Этеевин темдглсәр, «Цифровая экономика» Келн-улсин төсв күцәлһнә йовудт хамгин түрүнд социальн чинртә объектст интернет орулгдв. 2021-ч җиләс авн таңһчин райодт дунд сурһульмудт, дегтрин саңгудт, ФАП-мудт интернет орулгдв. Көдлмш цааранднь 2030-ч җил күртл күцәгдхмн, таңһчин 72 селәнд интернет ирхмн, гиҗ Алексей Петрович иткүлв.

Тер мет эн җилд таңһчин арвн селәнд интернет орулгдх, эн селәд олн-әмтнә дууһан өглһнә ашар нүүрт һарв.

КАРСАНА Евгения

Видео