Эрмдгтә улст – сән таал

14-01-2023, 22:38 | Общество, Таңһчин зәңгс

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, давсн җилд Элстин медәтнрин болн гемтә-шалтгта улсин гер-интернатд сән таал тогталһна туст чинртә керг-үүлдврмүд күцәгдв.

«Доступная среда» гидг шаңһа көтлврин медлд йилһгдсн 1,5 сай арслңгар шишлң кергсл хулдҗ авгдв, төсвин-һаруһин бәрмт цаасн белдгдв, «Өршәңгү седкл» («Милосердие») гидг әңгд бийән уһадг хорад ясвр кегдв, күнд гемтә улсин төлә сән таал тогтагдв.

– Элстин медәтнрин болн гемтә-шалтгта гер-интернат 2022-ч җилд «Доступная среда» гидг шаңһа көтлврин керг-үүлдврмүдин орлцачнрин тоод орв. Ода социальн бүрдәцд мөч тату болн күнд гемтә улсин төлә сән таал тогтагдв, эдн кемтг угаһар олн зүсн керг-үүлдврт орлцҗ, талдан әмтнлә харһҗ цаган тустаһар давулҗ чадҗана. Гер-интернатд 156 иргн бәәнә, теднәснь 94 күн гемтә-шалтгта улс болна. Социальн бүрдәцд бәәдг улс эднә бәәдл-җирһлин таал ясрулҗахиг өөдәнәр үнлнә, – гиҗ таңһчин социальн делгрлтин, күч-көлснә болн көдлмшәр тетклһнә министр Өлзәтин Марина темдглв.

БАТАН Сәәхлә
ЗУРГТ: бийән уһадг хорад сән ясвр кегдв

Видео