Чик авг-бәрц батрулхар

17-01-2023, 22:45 | Общество, Таңһчин зәңгс

Хальмг Таңһчин социальн делгрлтин, күч-көлснә болн көдлмшәр тетклһнә министерств болн «Байрта көгшрлт» («Старость в радость») гидг буйнч седклин саң хоорнд батлсн бооцана медлд олн зүсн керг-үүлдвр давулгдна. Шидр Целинн районд үүлддг медәтнрин болн гемтә-шалтгта улсин гер-интернат спортивн кегдлмүдәр теткгдв.

Гер-интернатд медәтнрин болн эрмдгтә улсин цогц-махмуд батруллһна эмнлһнә болн спортивн кичәлмүд давулгдна. Тегәд шин спортивн кегдлмүд терүнд олзлгдҗ, медәтнр болн гемтә-шалтгта улс дунд чик авг-бәрц батруллһнд туслхнь лавта. Баскетбол, волейбол болн футбол наадхин төлә меечгүд, кергсл, массаж кедг кегдлмүд, көл-һар батрулдг шишлң тоот болн нань чигн спортивн эв-арһс ода гер-интернатд бәәнә. Саң йилһсн 100 миңһн арслңгар ут тоодан 70 эд-тавр хулдҗ авгдв.

Давсн җилд шин бүүрт орсн гер-интернатд спортивн кичәлмүд давулхин төлә ЛФК-н онц зал бәәнә. Медәтнр баг-багар эс гиҗ онц кичәлд орлцҗ, цогц-махмудан батрулна. Мөч тату, гемтә-шалтгта улсиг шишлң кергсл олзлҗ ЛФК-н залд күргнә эс гиҗ хораднь кичәл давулна. Кичәлмүд өдр болһн медицинск шинҗллтин хөөн болна, эрүл-менд харлһна көдләчнр түрүләд медәтнрин цусна дарлт, халу шинҗлнә. Кичәлд дундлад 20-30 күн орлцна, эдн мергҗлтин хәләврт даалһвр күцәҗ цогц-махмудан батрулҗ спортивн наад наадна.

– Мана таңһч «Байрта көгшрлт» гидг буйнч седклин саңгин «Мини бәәдг гер» гидг төсвин керг-үүлдврмүд күцәгддг регионмудын тоод орв. Төсвин медлд 4 гер-интернат спортивн кегдлмүдәр, мөч тату улсиг асрлһна төлә керглгддг эв-арһсар теткгдхмн. Саңгин көдләчнр мана социальн бүрдәцсин үүлдвриг өөдәнәр үнлҗ, төсвин керг-үүлдврмүдиг үнн-чик седклтәһәр күцәҗәнә. Бидн саңгин һардврт болн көдләчнрт ик ханлтан өргҗәнәвидн, мана нөкцлт делгрҗ медәтнрт болн гемтә-шалтгта улст туста болх гиҗ ицҗәнәв. Бидн саңгин талдан төсвст орлцхдан белн бәәнәвидн, – гиҗ таңһчин социальн делгрлтин министр Өлзәтин Марина темдглв.
«Байрта көгшрлт» гидг буйнч седклин саң «Мини бәәдг гер» гидг төсвин керг-үүлдврмүдиг президентск мөрән саңгин дөңгәр күцәнә. Давсн җилд саң мана таңһчин социальн бүрдәцсиг шишлң өлг-эдәр теткв, социальн теткврин комплексн төвмүдин хәләврт бәәдг медәтнрт Шин җилин белгүд бәрүлҗ өгв.

БАТАН Сәәхлә
ЗУРГТ: «Байрта көгшрлт» гидг буйнч седклин саң тетксн
спортивн кегдлмүд медәтнрт таасгдв

Видео