Эцкиннь үлгүрәр малд көдлҗәнә

24-01-2023, 11:01 | Общество, Таңһчин зәңгс

Мал асрхла амн тоста, гиҗ хальмгуд келдг. Ик кезәнәс авн мана өвкнр малын ард йовдг улс мөн. Өдгә цагт селәнә эдл-ахун халхар көдлхд амр биш гиҗ келх кергтә.

Санл Менкеев Целинн районд крестьянск-фермерск эдл-ахуһан бүрдәсн һардачнрин дунд дамшлтта, чадмг, дааврта фермер болҗ тоолгддг. Санл Көтчнрә района Шатта селәнд олн үртә өрк-бүлд һарч, бичкнәсн авн шулун-шудрмг көвүн болв. Дунд сурһульд сәәнәр сурч, эк-эцкдән, ахнртан нөкд болхар шунҗ өслә. Темдглхәс, Санлын эцкнь Сорва Циганкаевич олн җилдән хошт көдләд, мал өсклһнә халхар ик күцәмҗ бәрәд, Күч-көлснә Улан Тугин орденәр ачлгдсн билә. Санл Менкеев бичкнәсн авн эцкиннь болн ахнриннь арднь орҗ мал өсклһнд орлцлҗ өссн күн болна. Дунд сурһулян төгсәһәд, эн цергт мордв. Хабаровск балһснд тусад, Т-8 танкин инструктор болҗ церглв. Цергәс бууҗ ирәд, Хальмг ик сурһулин тосхлтын дацңд орҗ сурв. Мел тер цагт Элстд нарт-делкән шатрин XXXIII Олимпиад давулхин төлә Сити-Чесс балһсиг экләд тосхҗала. Тосхачнрин хату цаасан шинкн авсн баахн мергҗлтнриг эн көдлмшт орулв. Экләд көдлҗәхд, эцкнь сәәһән хәәсн учрас Николай ахнь хоштын көдлмшиг һардв. Ахдан нөкд болхар Санл герүрн хәрв.

Ах-дү Менкеевихн эцкиннь кергиг цааранднь чадмһа кевәр давулв. Бичкнәснь авн мал өсклһнә көдлмшиг эцкнь көвүдтән зааҗ өгәд, цуг таласнь кергтә тоотын тускар тодрхаһар цәәлһдг билә. Цаг зуур Шатта селәндән көдлҗәһәд, хөөннь Элстин өөр эдл-ахуһан бүрдәхәр шииднә. Түрүләд Целинн района Вознесеновск СМО-д һазр нәәмәдлҗ, хөөннь эврәннь хоштан энд бүрдәсн болдг. Ода ах-дү Менкеевихн селәнә эдл-ахун халхар хөрн һар җилдән күцәмҗтәһәр көдлҗ йовна.
Эн җилмүдин туршарт Санл Менкеев бод малын болн хөд өсклһнә халхар күцәмҗ бәрҗ таңһчин фермермүдин нүүрләчнрин тоод йовна, гиҗ темдглх кергтә. Дәкәд келхд, селәнә эдл-ахун халхар давулдг керг-үүлдврмүдт даңгин орлцна. 2019-2020-ч җилмүдт Санл Менкеев «Хальмг Таңһчин нүүрләчнр» марһана ашлгч девсңгин орлцачнрин тоод орсмн. Эн марһанд мал өсклһнә халхар таңһчд инвестиц оруллһна тускар төсвән харссн билә.

Эндр «Шатта» нертә крестьянск-фермерск эдл-ахуд 880 хөн болн бордлһнд 900 хурһн бәәнә. 2022-2023-ч җилмүдин үвлзлһнд 140 тонн шүрүн хот, 120 шаху тонн хольгдсн хот белдгдв. Хошт «МТЗ-82» тамһта трактор, «Нива» машин болн кесг мотоцикл бәәнә. Хаврин моһа болн мөрн сармудт сән төл авхар зуралҗанавидн, гиҗ фермер келнә.

Менкеевин Санлын келсәр, сүл җилмүдт махн үнтәрҗәнә. Эннь фермермүдт орутаһар көдлхд урмд өгнә, эдл-ахуһан улм делгрүлҗ, малын тооһан икдүллһнд, сән таал тогталһнд эрк биш тусан күргнә.

Эндр Санл Менкеев тавн үртә, өнр-өсклң өрк-бүлин герин эзн болна. Галина авальтаһан үрдән өскҗ, эдндән сурһуль өгчәнә. Көвүднь чаңһ-чиирг залус болҗ, эцкдән хошт чадсарн нөкд болна. Иргчдән мал өсклһнә кергиг аавиннь болн эцкиннь үлгүрәр цааранднь күцәҗ йовх гиҗ сангдна.

КАРСАНА Евгения

Видео