Сән дурни үүлдвр

24-01-2023, 22:48 | Общество, Таңһчин зәңгс

Сүл цагт орн-нутгт волонтермуд гиһәд эврә сән дурар әмтнд дөң болдг, олна кесг үүлдврт шунҗ орлцҗ нөкд болдг әмтнә то икдв. Тиим сән седклин җисән буйнч ик керг күцәҗәнә. Баһчуд терүнд оларн орлцснь сән темдг гих кергтә. Ода теднә орлцан уга ямаран чигн үүлдвр давхш.

Эврә сән дурарн наста әмтн чигн эн үүлдврт орлцҗахинь цугтан меднә. Иигәд «Серебряное волонтерство» гиһәд зөвәр олн күн орлцдг җисән таңһчд делгрлт авв. Эднә үүлдвр цуг орн-нутгт темдгтә болад, давсн җилин сүл сард Москвад болсн ик хургт эн җисәнә гешүд орлцв. Наста улсин эн җисәнә орлцачнрин хург «Единая Россия» партин талвңд болснь темдгтә. Хальмгин социальн харслтын министерствин кемҗәнд эн җисән үүлднә. Әмтиг социальн тетклһнә комплексн цутхлңд эдн үүлднә. Эн җисәнә элч Олег Колгин таңһчин нерн деерәс эн керг-үүлдврт орлцв.

Волонтермудын эн клуб үүлдсн цагас авн Олег Аркадьевич терүнә ханьд орсмн. Сойлын, спортын, эрүл-менд харлһна болн олна нань чигн керг-үүлдвр бүрдәлһнд клубин гешүдлә хамдан эн шунмһа дөң болна. Медәтә улсла даңгин харһна, «Социальн туризм» гидг клуб бүрдәв. Энүнә седвәрәр клубин өөр негдҗ үүлдҗәх наста әмтн җилд нег эс гиҗ хойр дәкҗ орн-нутгар зуучлҗ йовх арһта болв. Эрүл-менднь ода чигн бат, көдлмш кеһәд, олн дунд йовад дассн улс бичә хара суутха гиһәд, Олег Аркадьевич кесг керг-үүлдврт тедниг орлцулна. Юунас чигн үлдлго, олна җирһлд орлцҗ йовхарн урмд авад, медәтнр цуг әмтнлә тиигәд нег зергләнд йовна.
Москвад болсн форумд чинртә кесг төрәр өргн күүндвр болҗ, волонтермуд дамшлтарн хувалцсмн. Иим харһлтсин чинринь темдглсн деерән медәтә әмтнә сән дурни үүлдврт грантмудын болн нань чигн дөң кергтә болҗахин тускар үг һарсинь Олег Аркадьевич тодлҗ келв.

Цуг әмтнд кергтә көдлмшт орлцҗ, эврә сән дурарн олнд дөң болҗах улсин үүлдвр дөңндх зөвтә. Олег Колгин болн өөрнь дахҗ олна үүлдврт орлцҗах өр-өвч седклтә эн медәтнр бийснь чаңһ-чиирг бәәсн деерән талдан әмтнд дөң болхар адһдгнь сән йовдл. Тиигчкәд эдн цаган, чидлән әрвллго кергтә болхла цуглрҗ ирәд, кергтә көдлмшиг күцәнә. Баһчудт эннь ямаран сән үлгүр болҗана. Ачта амрлһнд бәәсн бийнь эдн олнд дөң күргхәр шунна, иим үүлдврин йовудт шин олн үүрмүдтә болад, сул цаган сергмҗтәһәр давулх арһ эднд учрна.

Социальн харслтын министерств эднә үүлдвриг цуг халхарнь дөңнәд, 2023 җилд чигн эн үүлдврт олн медәтнриг орлцулхар шунҗана. Төвкндго седклтә әмтн даңгин кергтә. Җирһлин көрң буслҗах һазрт эдн түрүн зергләнд йовна. Министр Марина Ользятиеван тоолврар ах үйин улсин дөң угаһар уралан йовхд, шин олн тоотыг сөрҗ үзхд зөвәр күнд болх. Эднә килмҗ, җирһлин ик дамшлт даңгин туста болна.

«Ах үйин улс» гидг региональн төсвин кемҗәнд Элстәс нань райодар чигн медәтә әмтн орлцдг җисән делгрлт авсн бәәнә. Иигәд Хар Һазрин района «Серебро Черноземелья» гидг клубд 15 шунмһа медәтнр үүлднә. Районд болдг олн керг-үүлдвр бүрдәлһнд эдн даңгин нөкд болна.

Приютненск районд «Рука помощи», Яшалтинск районд «Дорогою добра», Сарпинск районд «Серебряный возраст» гидг болн нань чигн клубмуд үүлднә. Медәтнрин дамшлтыг болн олна көдлмш бүрдәҗ чаддг арһинь олзллһар, тедниг района җирһлд орлцуллһар тиигәд район болһнд баһ биш көдлмш кегдҗәнә.

ҖИРҺЛИН Кермн

Видео