Оютнриг сән Өдрләнь йөрәв

28-01-2023, 22:56 | Общество, Таңһчин зәңгс

Әрүн Татьянан өдрлә мана орн-нутгт оютнрин сән өдр болна. Хальмг Таңһчин Толһач Хаска Бату эн өдр Т.Хахлынован нертә медицинск колледжд одад, тенд секгдсн урн-ясврин хорас хәләҗ, оютнрла харһҗ күүндв.

Медколледжин һардач Манҗин Кермнә келсәр, давсн җилд эднә улд «Сурһуль-эрдм» гидг келн-улсин төсвин «Баһ наста эрдмчнр» гидг федеральн төсвин медлд йилһгдсн мөңгәр хойр урн-ясврин хора секгдв. Тиигәд, «Медицинск болн социальн хәләвр» болн «Эмнлһнә үүлдвр» гидг урн-ясврин хораст оютнр түрүн дөң күргдгиг дасна. Энд оютнр дассн медрлән батрулҗ, дамшлт хоршахин төлә цуг таал тогтагдв. Фельдшерин, акушерин, медицинск эгчин эрдм дасчах баһчудын төлә олн зүсн кергсл, сурһулин дөңцл болн эв-арһс бәәнә. Эн җил сурһулян төгсәһәд фельдшерар көдлх Эрднин Адьян болн Анкан Гилән ФАП-ин кабинетд ЭКГ-шинҗллт кеҗ, ямаран түрүн дөң күргхән үзүлв. Бату Сергеевич оютнрла күүндәд, сурһулин таалын тускар сурв, иим урн-ясврин хорад дамшлт хоршалһнд туслдгиг оютнр темдглв.

«Негдсн Әрәсә» партин Генеральн хүүвин сегләтрин дарук Дарья Лантратован болн Әрәсән орн-нутгин Хүүвин депутат Башанкан Бадмин седвәрәр регионмудт сән дурар үүлддг улсин төлә түрүн дөң күрглһнә сурһуль бүрдәгдсн бәәнә. Мана таңһчд тиим кичәлмүд Т.Хахлынован нертә колледжин улд нидн үкр сарас авн эклв. Ода деерән дөч һар күн сурһулян төгсәһәд, бачм бәәдлд түрүн дөң күргдгиг дасч авв. Ода энд дәкәд 14 күн сурчана, эднә кичәлмүдиг таңһчин Толһач Хаска Бату бас хәләв. Багш Татьяна Маяцкая дигтә шарх-шав авсн улст дөң күрглһнә диг-дара зааҗасн билә, тегәд Бату Сергеевич кичәләр соньмсв. Таңһчин бичкдүдин зөв харслһна элч Чужан Наталья авальтаһан хамдан эврә сән дурар эн курст бас сурчана, тегәд энүнә келсәр, күн болһн түрүн дөң күргдгиг дасх зөвтә. Эн кичәлмүдт колледжин багшнр цугинь тохнятаһар зааҗ өгнә, тегәд бачм бәәдлд туссн цагт эдн күүнә әм аврҗ дөң болҗ чадхмн.

Урн-ясврин хорас хәләснә хөөн таңһчин Толһач Хаска Бату, «Негдсн Әрәсә» партин КРО-н региональн күцәгч комитетин һардач Байир Путеев, таңһчин эрүл-менд харлһна министрин дарук Оксана Курдюкова оютнрла «төгрг ширә» эргҗ сууһад, седвәртә баһчудыг дөңнлһнә, олна үүлдврт орлцлһна, волонтерск җисә делгрүллһнә төрмүдәр күүндв. Медколледжин һардач Манҗин Кермн оютнриг сән өдрләнь йөрәһәд, сансн санаһан күцәҗ күцәмҗтә улс болхин төлә өмәрән зүткҗ олна нүүрт йовхиг күүкд-көвүдт дурдв. Колледжин оютнр региональн болн Цугәрәсән марһаст, керг-үүлдврмүдт орлцна, эдн сән күцәмҗ бәрҗ сурһулин нериг өөдән бәрнә, энд медикүд-волонтермуд үүлднә гиҗ Кермн Менриковна темдглв.

Оютнрин сән өдрлә ирлцүлҗ Бату Сергеевич сурһулян сәәнәр сурдг, олна җирһлд шунмһаһар орлцдг оютнр Батан Батад, Басана Алинад, Энкән Санҗд, Рыжован Ульянад болн Дениса Валерияд Ханлтын бичг болн «Джунгар» гидг мөснә бәәшңд одх сертификат бәрүлҗ өгв. «Оютн бәәсн цаг хамгин сәәхн цаг болна, тегәд терүг сергҗмтәһәр болн тустаһар давултн. Эн цагиг ямр кевәр давулснас тана иргч җирһл ямаран болхнь ирлцнә, тегәд талдан баһчудла таньлдтн, өмнән олн зүсн күсл тәвтн. Мана баһчуд седвәртә, шунмһа, эдн эврәннь арһ-чидлдән иткҗ олна бәәдл-җирһлд орлцна, буйнч седклтә керг-үүлдврмүдт дөңгән күргнә. Цуг эднә үүлдвр мана орн-нутгиг батруллһнд туслна. Эднд цуг халхин дөң күрглһн мана һол күсл болҗана», – гиҗ Бату Сергеевич келв.

ДООҖАН Наталья

Видео