Көдлмш хәәҗәх улст туслна

28-01-2023, 23:01 | Общество, Таңһчин зәңгс

Шидр Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Мамина Ольга болн министерствин әңгин һардач Цаһан-Манҗин Марина «Калмыкия» гидг таңһчин зәңгллһнә агентствд болсн брифингд әмтиг көдлмшәр тетклһнә туст әмтнд дөң күрглһнә туст күцәгдҗәх керг-үүлдврмүдин тускар келҗ өгв.

Харһлтын эклцәр Мамина Ольга 2022 җилд көдлмш уга улст туслдг керг-үүлдврмүдин аш диглҗ, таңһчин күч-көлснә рынкд тогтсн бәәдлин тускар тооца кев. Тиигәд, дааврта һардачин темдглсәр, мана таңһч күч-көлснә рынкин таал нәрн гиҗ тоолгддг регионмудын тоод ордг болв чигн давсн җилд сән таал тогтв. Сүл җилмүдт мана таңһчд көдлмш уга улсин то баһрҗана, нидн 4 миңһн күн көдлмшәр теткгдв. Ода таңһчд 1600 сул көдлмшч орм бәәнә, эрүл-менд харлһна, сурһуль-эрдмин, хулд-гүүлгәнә халхд көдләчнр кергтә болҗана. Тиигәд, таңһчин эмнлһст 666 орм, сурһуль-эрдмин халхд 285 орм бәәнә, тенд 16-40 миңһн арслңга җалвта көдлмш олҗ болхмн. Көдлмш хәәҗәх улст туслдг шаңһа көтлврмүдин тускар брифингд орлцачнр онц келв. «Демографь» гидг келн-улсин төсвин «Көдлмш олҗ авхд тусллһн» гидг федеральн төсвин медлд әмтн немр сурһуль сурна, мергҗлтән өөдлүлнә, 35 нас күрәд уга баһчудыг көдлмшт авсн бүрдәцс һаруһан даңцалһнд субсидь авна. Давсн җилд 82 бүрдәц бооца батлад, 425 күн көдлмшәр тетксндән шаңһа дөңцл мөңг авв, 263 иргн сурһуль сурв, теднәснь 228 күн шин эрдмәрн көдлмш олв. Эн җил төсвин керг-үүлдврмүд цааранднь күцәгдхмн.

«Әрәсәд көдлмш» гидг шишлң порталар дамҗулад әмтн шаңһа туслмҗиг электронн эв-арһар авдгиг министрин дарук темдглв. 2022 җилд 11,8 миңһн эрлһ орҗ ирв. Урднь зуг хойр туслмҗ электронн эв-арһар күрггддг бәәсн болхла 2023 җиләс авн наадк туслмҗ бас тиим кевәр күрггддг болхмн. Әрәсән орн-нутгин Хүүвд ода әмтиг көдлмшәр тетклһнә федеральн заканд сольвр оруллһна закана төсв орулгдсн бәәнә, тегәд күч-көлсчнрин зөв харслһна, шаңһа туслмҗ күрглһнә туст шинрлтс батлгдхмн гиҗ күләгдҗәнә. Көдлмш уга улст, шиңкән сурһулян төгсәсн баһчудт, үрән күсдундур нас күртл асрҗах күүкд улст, пенсьт удл уга һарх көдләчнрт көдлмш олҗ авхд туслх керг-үүлдврмүд цааранднь күцәгдхмн.

Урднь мана таңһчд күч-көлснә ормсин яарм давулгддгин тускар гиичнр бас келв. Тиигәд, пандемийин өмн мана таңһчд җил болһн бүрдәгддг керг-үүлдвр саглуллһна некврмүд батлгдсна ашт давулгддган уурв. Болв таңһчин шишлң сурһуль-эрдмин бүрдәцст сурһулян төгсәҗәх оютнрин төлә иим керг-үүлдрмүд урдк кевәр болна. Эн җил көдлмш уга баһчудын болн гемтә-шалтгта улсин төлә иим яарм давулх зура бәәнә гиҗ эдн темдглв. Көдлмш уга болн җирһлин күнд таалд туссн улст социальн бооца батлҗ шаңһас дем авлһн эврә керг, онц эдл-аху бүрдәлһнд бас туслдгиг эдн заав.

БАТАН Сәәхлә

Видео