Сурһульд бат ясвр кеснә ашт

31-01-2023, 18:59 | Общество, Таңһчин зәңгс

«Сурһуль-эрдм» нертә федеральн келн-улсин төсв мана орн-нутгт 2019-ч җиләс авн өргнәр күцәгдҗәнә. Нарт-делкән нүүрлгч орн-нутгудын тоод орхин төлә сән медрл өгч, шин технологин эв-арһиг олзлҗ, дорас өсч йовх баһчудт өдгә цагин таал тогталһн эн төсвин һол күслнь болна. Эн җилмүдин туршарт мана орн-нутгин сурһулин олн бүрдәцст бат ясвр кегдҗ, селән һазрт болхла шин сурһульмуд тосхгдв. Келхд, намрар Троицкое селәнд шин сурһуль тосхгдад, һаха сарин 1-д байрин бәәдлд секгдсн болдг.

Шидр Яшкуль селәнә гвардин майор С.В.Санчировин нертә дунд сурһульд бат ясвр төгсв. Темдглхәс, урдк җилин хаврар эн сурһуль тәвн җилин өөнән темдглв. Өдгә цагт Яшкулин района сурһулин бүрдәцсин дунд эн сурһуль делгрүлгдҗәдг бүрдәцсин тоод ордг мөн. 2019-ч җилд «Әрәсән хамгин сән 100 сурһуль» марһана лауреатнрин тоод орв, урднь 2006-ч җилд болхла бас Хальмг Таңһчин хамгин сән сурһульмудын тоод орад ончрсн билә.

Эн дунд сурһулин һардач Наталья Бадма-Горяеван келсәр, 2022-ч җилин хаврар «Сурһуль-эрдм» федеральн келн-улсин төсвд орад, бүрдәцд бат ясвр экләд кегдв. Эн ясврин йовудт ик көдлмш күцәгдв гиҗ темдглх кергтә. Сурһулин бәәрн шинрүлгдв, эрсмүдинь ширдәд, үүдд – терзмүдинь сольв, дуланар тетклһнә түүмрәс саглуллһна кергслмүд углҗ тәвгдв. Классин хораст шин мебель хулдҗ авгдв. Терүнәс нань сурһульчнрт өдгә цагин некврлә ирлцҗәдг интерактивн самбрмуд, шин компьютермүд бас хулдҗ аввидн, гиҗ Наталья Васильевна келв. Тер мет спортивн зал, хот уудг хора бас ясгдад, шин кергсләр теткгдв. Эн дунд сурһуль хойр герт бәәршлнә. Негнднь эклц классмудын сурһульчнр орна, хойрдгчднь болхла 5-11-ч классмудын көвүд-күүкд сурна. Сурһулин бүрдәцсин хальмг келнә багш Валентина Очирован темдглсәр, бат ясвр кегдәд, шинрүлгдсн сурһульд көдлхд амр болна, юңгад гихлә, негдвәр, сәәхн өңгтә хорас күүнә нүд байрлулна, хойрдвар, шин мебель болн шишлң кергсл хулдҗ авгдснь бас йир сән йовдл, гиҗ багш келнә. Валентина Болхаджаевна эврән эн дунд сурһулиг төгсәлә, ик сурһульд хату цаасан авад, төрскн сурһульдан ирҗ багшлв. Эндр Валентина Очирова ик дамшлтта, гүн медрлтә багш мөн. Күч-көлснә хаалһан эклҗәдг баахн багшнрт сүв-селвгән өгч, байн дамшлтарн хувалцна.

Эн җилд сурһулян төгсәҗәх 11-ч классин сурһульч Евгений Новосельцев ухан-тоолврарн бас хувалцв. Энүнә келсәр, сурһульд бат ясвр күцәгдснь арвтнрт таасгдҗана. Эн җил би сурһулян төгсәҗәнәв, мини дү күүкд болхла цааранднь энд сурхмн.

Яшкулин района муниципальн бүрдәцин Владимир Санграевин темдглсәр, деер келгдсн сурһулин бат ясврин көдлмшт 91 сай һар арслң йилһгдв. Эн мөңгнәс 6,5 сай арслң дунд сурһулин төлә шишлң кергсл хулдҗ авлһнд һарһгдв. Дәкәд, эн җилд келн-улсин төсв күцәлһнә йовудт Яшкулин Е.К.Хаглышеван нертә олн салврта гимназин бат ясврт 122 сай арслң йилһгдҗәнә, Утта селәнә дунд сурһульд болхла 61 сай һар арслң һарһгдхмн, гиҗ Владимир Сергеевич келв. Терүнәс нань мана районд баахн мергҗлтнриг дөңнхин төлә цуг таал тогтагдҗана. 2022-ч җилд баахн дөрвн багшт нег дәкҗ өгдг мөңгнә дөң күргв, эннь 200 миңһн арслң болв, гиҗ РМО-н һардач онц темдглв.

Өдгә цагт дунд сурһульд 42 багш көдлнә, тедн дунд Хальмг Таңһчин ачта һурвн багш, Әрәсән сурһуль-эрдмин күндтә 15 көдләч, гегән-герлин йилһән сән нег көдләч мөн. Энд ут тоодан 483 сурһульч сурна. Эн сурһулин бүрдәц байн тууҗта болдг, энүг 1500 һар күн төгсәв, тедн дунд 61 сурһульч алтн болн цаһан мөңгн медальмүдәр ачлгдсн билә. Олн җилмүдин туршарт сурһульчнр таңһчин болн Цугәрәсән олимпиадмудт, марһаст орлцад төрскн сурһулин неринь дуудулҗ йовна. Бат ясвр өөнин җилд кегдснь бас темдгтә гиҗ келх кергтә.

КАРСАНА Евгения

Видео