Өлзәтә үрд болҗ өстхә!

02-02-2023, 19:56 | Общество, Таңһчин зәңгс

О.Шунгаеван нертә перинатальн төвд эн җилин эклцәс авн зу һар нилх төрҗ һарв. Хальмг Таңһчин Толһачин зәрлгәс иштә эн җиләс авн мана таңһчд эклсн «Нилхин белг» гидг керг-үүлдврин медлд нилх болһнд белг бәрүлҗ өггдҗәнә. Шидр перинатальн төвд Мутля болн Валентина Ильдыковихнә өрк-бүлиг Җаңһр көвүнь төрҗ һарснла йөрәҗ, герүрнь хәрүлв. Көвүн эн җилин эклцәс авн төрҗ һарсн зуудгч нилх болв, өрк-бүлдән болхла эн тавдгч үрн болна.

Мутля болн Валентина Ильдыковихнә өрк-бүл Октябрьск района Цаһан Нур селәнд бәәнә. Баахн эк-эцк хойр өвкнриннь авъясар кен ахан күндлҗ, бичкнән өкәрлҗ, күүкдтән чик сурһмҗ өгхәр шунна. Бийснь эдн өнр-өсклң өрк-бүлмүдт өсәд-боссмн, тегәд олн үртә болхар санҗала. Мутля хойр эгчтә болн хойр дүүтә, Валентина болхла долан үртә өрк-бүлд өссмн. Эдн ханьцад, арвн хойр җилдән ниитә бәәнә. Темдглхәс, баһчуд герин эзнь төрҗ һарсн Цаһан Нур селәнд бәәнә, эдн эврә гертә, эндәс нүүхәр седҗәхш. Селәнд дунд сурһуль болн бичкдүдин сад бәәнә, олна дамшлтын эмчин офис үүлднә. Ууһн Иван болн Церн сурһульчнр, Баир эн җил бас сурһульд орхар белдҗәнә. Ода эн Даяна дү күүктәһән бәәрн бичкдүдин садт орна. Көвүд сурһулян йилһән сәәнәр сурна, эдн футболын болн бөк бәрлдәнә секцд орҗ чик авг-бәрцәр бәәнә.

– Мана көвүн эн җил төрсн зуудгч үрн болснь маднд хойр дам байрта йовдл болв. Нилхд төрлһнә төвин эмчнрт болн цуг көдләчнрт бидн ик ханлтан өргҗәнәвидн. Тенд өөдән мергҗлттә, байн дамшлтта, кергән сәәнәр меддг, цаһан седклтә улс көдлнә. Саата күүкд улст болн нилхд эдн килмҗән тусхаҗ, кергтә эмнлһ кеҗ, цугинь зааҗ өгнә. Мана тавн үрн цугтан тенд төрҗ һарв. Эн җиләс авн мана таңһчин Толһачин белг нилх болһнд бәрүлҗ өгдгнь бас байрлулв. Нилхд кергтә хувцн, терүг асрх эд-тавр, кегдлмүд бәәнә, тегәд эк-эцкнрт мөңгән һарһх керг уга болв. Төвин эмчнр мадниг йөрәһәд, бат эрүл-менд дурдҗ, байрин бәәдлд мадниг герүрн хәрүлв, – гиҗ Валентина бер келв.

Мутля Ильдыков Москва балһснд УФСИН-а халхд көдлнә, ода эн амрлһндан бәәнә. Герин эзн көдлмштән йовхлань, Валентинад Екатерина Базыровна экнь болн Любовь Цереновна хадм экнь ирҗ дөң болна. Эднә көвүн туула сарин 24-д төрҗ һарсн болхла, маңһдуртнь Мутлян дүнь бас эцк болв. Тегәд Любовь Цереновна ода теднд ачан хәләҗәнә. Келхд, ээҗ 14 ач-зеетә, тегәд цугтаднь килмҗән тусхах кергтә болна. Баахн экин келсәр, көвүднь герин көдлмш кеҗ бас нөкд болна, эдн ааһ-саван уһана, хорасан ахулна, бичкн дүүһән хәләнә. Даяна күүкн ода эгч болсндан бас теңкән уга байрта бәәнә, эн бас чадсарн эк-эцкдән дөң болхар зүткнә. Олна дамшлтын эмчин офисин медицинск эгч Хоҗһәрән Галина бас дару-дарунь җиңнүләд, нилхин эрүл-мендин бәәдләр соньмсна. «Нанд нөкднр дала, цуһар маднд килмҗән тусхаҗ, сүв-селвгәрн болн бүлән үгәрн урмд өгнә, кергтә болхла ирәд дөң күргнә. Тавн үр асрхд амр биш, болв энтн байр үүдәдг даавр», – гиҗ Валентина келнә.

О.Шунгаеван нертә перинатальн төвин ах эмч Динкин Галинан келсәр, туула сард 142 нилх төрҗ һарв, теднәснь 70 күүкн болн 72 көвүн болв. Цуһар эдн Хальмг Таңһчин Толһачин белг авсндан байрта бәәнә, иим сән авъяс орулгдсиг өөдәнәр үнлв. Сүл цагт баахн өрк-бүлмүд олн үртә болҗахнь ик байр үүдәнә гиҗ Галина Капитоновна темдглҗ, нилхд эрүл-менд, өлзәтә сән үрд болҗ өстхә гиҗ дурдв.

ДАВАН Наталья
ЗУРГТ: олн үртә Мутля болн Валентина Ильдыковихнә өрк-бүлиг йөрәҗәх кем

Видео