Сарул-сәәхн «Буратино» садт

04-02-2023, 20:13 | Общество, Таңһчин зәңгс

Сүл җилмүдт мана таңһчд федеральн болн региональн келн-улсин төсвс өргнәр күцәгдҗәнә. Энүнә йовудт таңһчин селәдәр социальн чинртә бүрдәцс тосхгдҗ эдлврт орулгдв.

Шидр Целинн района Троицкое селәнд «Буратино» нертә шин бичкдүдин сад байрин бәәдлд секгдв. Нааран күсдундур настаһас авн һунта бичкдүд ирхмн. Бүрдәцин багтамҗнь 30 орм болна.

Шин бичкдүдин сад секгдснь Троицкое селәнә улсин төлә байрта йовдл болҗана. Энүнә тосхлһнд 30 сай һар арслң һарһгдв. Сад ахр цагин болзгт тосхгдв, эн ик көдлмшт орлцсн цуг улст, нег үлү района Залврин мергҗлтнрт, тосхачнрт ханлтан өргҗәнәв, гиҗ Целинн РМО-н толһач Эрднь Опиев келв.

Района сурһуль-эрдмин Заллтын һардач Эльза Чульчаеван темдглсәр, шин бичкдүдин садт көдлх коллектив батлгдв. Һучн көвүн-күүкн хойр багд орхмн, эднлә дөрвн сурһмҗлач көдлхмн. Терүнәс нань хальмг келнә багш, логопед, психолог, көгҗмин сурһмҗлач болн талдан мергҗлтнр бас эдниг сурһхмн.

«Демографь» келн-улсин төсвин йовудт тосхгдсн бичкдүдин садт өдгә цагин цуг таал тогтагдсн бәәнә. Эннь хойр багин күүкд унтдг хорас, хот-хоолын болн эмчин бәәрн мөн. Садын эргндк һазрт бас сән таал тогтагдв, бичкдүд һаза һарч, цевр аһар киилҗ, у-өргн талвңд наадҗ чадхмн. Эн байрта йовдлд орлцхар эк-эцкнр олар ирв. Хойр үртә эк Мария Ганинкон келсәр, үрднь шин бичкдүдин садт орхнь байрта болҗана. Олн эк-эцкнрин нерн деерәс Хальмг Таңһчин болн Целинн района һардврт ик ханлтан күргв. «Алтн түлкүр», «Харада» нертә Троицкое селәнә бичкдүдин садын көвүд-күүкд болн селәнә билг-эрдмин сурһулин сурһульч Лиза Соваева байрин концертд орлцв.

Видео