Нег һазра улсин дөң цергчнриг урмдулна

04-02-2023, 20:21 | Общество, Таңһчин зәңгс

Шишлң цергә керг-үүлдврт орлцҗах цергчнр даалһвран күцәһәд, бүрн-бүтн хәрҗ иртхә гиҗ бидн цуһар дотран зальврҗ, тедниг дөңнхәр буйнч седклин керг-үүлдврмүдт орлцнавидн. Өдр болһн бидн зәңгллһнә һарцс хәләҗ, цергә даалһвран күцәҗ йовх залу улс гертәсн бичг эс гиҗ белг авхларн байрлҗ, эднд таньл уга улс цаһан седкләсн дөң күргдгиг өөдәнәр үнлдгиг үзнәвидн. Әмтнә бүлән үг болн цаһан седкләсн илгәсн белг эднд ик урмд өгнә. Нег үлү бичкдүд эс гиҗ ах үйин улс эднд бичг бичҗ, күнд цагла дөңнҗәхән медүлхлә, цергчнрт ик байр үүдәнә.

Городовиковск района әмтнә социальн теткврин комплексн төвин көдләчнрин хәләврт бәәдг медәтнр болн эрмдгтә улс буйнч седкләсн цергчнрт дөңгән күргхәр бас шунна. Тиигәд, Лазаревское селәнд бәәдг Майя Андреевна Бережная цергчнрт ноосар өөмс өлгв, терүг авч ирхләрн медәт шикр-балта, хальмг цә болн медицинск кегдлмүд белдәд, энүнә нерн деерәс көвүдт илгәхиг сурв. Нина Андреевна Савченко Городовиковскас бас өөмс өлгв, энүнә кегдлмүд цергчнриг үвлин киитнд дулалҗ даарлго эрүл-менд йовхд туслтха гиҗ ээҗ дурдв. Медәтнр Раиса Федоровна Безниско, Любовь Арсентьевна Лабунская, Светлана Федоровна Кальдинова, Людмила Ивановна Киевская, Мария Алексеевна Луценко болн нань чигн көгшд пенсән авхларн демән күргҗ, гертәсн хол йовх цергчнрт кергтә тоот хулдҗ авч өгүлхиг сурв. Чернобыльд учрсн аюл уга келһнд орлцад, залу-зөрмгән үзүлсн Петр Лиджиевич Церенов цергә даалһвр күцәлһн ик дааврта болдгиг сәәнәр меднә. Орн-нутгин дуудврар эн кесг җил хооран әәмшгтә бәәдлд көдләд, цергә даалһвран үнн кевәр күцәсмн. Тегәд Төрскнәннь әәмшг уга бәәдлин төлә эндрк баһчуд цергә даалһвран күцәҗәхиг эн дөңнҗ, бас чадсарн демән күргхәр зүткнә. «Мана көвүд эрүл-менд болн бүрн-бүтн хәрҗ иртхә. Бидн цуһар эдниг күләҗәнәвидн, диилвр бәрхин төлә эднд мана дөң кергтә. Иим күнд цагла мана орн-нутгин әмтн ниитә болҗахан олнд медүлх зөвтә», – гиҗ медәтнр цаһан седкләсн келнә.
– «Негдсн Әрәсә» партин «Ах үйин улс» гидг төсвин медлд туула сарин 10-с авн лу сарин 23 күртл мана орн-нутгт «Тепло для героя» гидг керг-үүлдвр зарлгдсн бәәнә. Терүнә йовудт ах үйин улс Әрәсән цергчнрт бичг бичәд, бүлән үгәрн тедниг дөңнҗ чадҗана. Җирһлин хаалһдан дәәнә болн тууврин зовлң даасн медәтнрин тодлврмуд болн заавр цергә даалһвран күцәҗ йовх залу улст эрк биш чидл урһах гиҗ сангдна. Мана социальн көдләчнр аав-ээҗнрт бичг бичхд дөңгән күргҗәнә. Дәкәд медәтнр өлгсн өөмс болн беелә бидн цергчнрт өглхвидн. Дулан кегдлмүд өлгх саната улсиг бидн утцар болн ноосар теткхвидн, тегәд һартан өөтә күүкд улс, баһчуд терүнд орлцхла сән болхмн. Эн керг-үүлдвр таңһчин райодт үүлддг социальн теткврин комплексн төвмүдт әмтн бичгүд болн өлгмр кегдлмүд авч ирҗәнә. Төрскән харсачин Өдр угтҗ цергчнрт илгәц йовулхмн, – гиҗ Городовиковск района КЦСОН-а һардач Хавляка Любовь келв.

Шидр Городовиковск района муниципальн бүрдәцин толһач цергә даалһвр күцәҗәх нег һазра улсин сурврар һуйр күргҗ өгв. Района КЦСОН-а көдләчнр теднә сурврар дрон хулдҗ авсн билә, тегәд терүг болн бәәрн әмтн авч ирсн хот-хол, дулан хувц, эм бас теднд йовулв. Цергчнрин өрк-бүлмүдиг района һардвр бас оньг угаһар үлдәхш, теднә төрмүдт орлцҗ, түрүн сурврарнь дөңгән күргнә.

«Олн-әмтнә фронтын баһчуд» болн «Урчнрин бүрдәц» гидг олна ниицәсин элчнр «Бидн хамдан» гидг региональн штабин улд шишлң цергә керг-үүлдврт орлцачнрт дулан хувц болн нань чигн кегдлмүд уйлһна цех бүрдәв. «Урчнрин бүрдәц» гидг олна ниицәнә һардач Лиҗһәрән Гилән уйдг машинкс авч ирв, ОНФ болхла кергтә эд йилһҗ өгв. Гилән Александровнан келсәр, эдн цергчнрт җиләтк, балаклав бас уйхар бәәнә. Буйнч седклтә улс терүг уйхин төлә шишлң эд авч ирв. Седвәртә улс эднә дуудврар ирҗ эн буйнч седклтә кергт орлцв. Тедн дунд сән дурар үүлддг Шаран Лейла ик тәвцән орулсн улсин негнь болна. Эн уячин эрдмтә, тегәд эд ишкҗ унтдг дулан мишг уйх улст эн белдв. Баһчуд, оютнр эн кергт шунмһаһар орлцҗ, цергчнрт килмҗән тусхаснь темдгтә.

ДООҖАН Наталья
ЗУРГТ: цергчнрт илгәц белдҗәх кем

Видео