Хәәртә үрнә нерн мөңкрүлгдв

14-02-2023, 22:23 | Общество, Таңһчин зәңгс

Лу сарин 10-д Сарпан района Аршан-Зелмн поселкд хальмг теегин хәәртә үрн, шүлгч, бичәч, һардач, номт, Хальмг Таңһчин билг-эрдмин ачта үүлдәч, Әрәсән сойлын ачта көдләч Санҗин Николайин санлынь мөңкрүлҗ бумблв секгдв. Эн көдлмшиг Әрәсән ачта зурач, скульптор Нарн Эледжиев күцәв.

Санҗин Николай түүкләнә болн шүлгләнә нәәмн дегтрин, 30 шаху дууна түүрвәч болна. Энүнә дегтрмүднь Хальмг Таңһчд, Бурятьд, Моңһлд барлгдсн билә. Терүнәс нань таңһчин сойлын, келн-улсин политикин болн шаҗна төрәр министрин үүлиг дааҗ йовсн цагтан төрскн һазрин сойл делгрүллһнд ик тәвцән орулсн һардач билә. Хальмг келндән хару, көдлмшән даавртаһар күцәһәд, олнд үлгүр болҗ йовсн үүлдәч бәәсмн. Санҗин Николайин нериг Хальмг Таңһчд меддго күн уга гиҗ келхлә буру болшго. Таңһчин болн Сарпан района һардврин, таңһчин сойлын бүрдәцсин, бичәчнрин ниицәнә элчнр, барин көдләчнр болн Николай Джамбуловичин өөрхн элгн-саднь, нег һазра улс, үүрмүднь бумблв секлһнә керг-үүлдврт орлцв.

Санлын керг-үүлдвриг Аршан-Зелмнә СМО-н толһач Муучкан Светлана секв. Энүнә темдглсәр, Санҗин Николайин төрскн таңһчдан күргсн ач-туснь ик, нег һазра улс тевчәд санлынь әрүнәр хадһлҗ йовна гив.

Цаһан седклтә, тоомсрта, күндтә Николай Джамбулович мадн дунд уга гиҗ төрүц уханд орхш, эн даңгин инәдтә-шогтаһар, ямр чигн кергиг цаг-болзгтнь күцәдг билә. Министрин үүлиг дааҗахд бийәснь дү мергҗлтнрт даңгин нөкд болҗ йовла. Аршан-Зелмнәс кесг билгтә улс һарснь маһд уга, Санҗин Николайин нерн болхла һанцхн эн һазра бәәтхә цуг Хальмг Таңһчин тууҗд орв, гиҗ Сарпан РМО-н толһач Манҗин Басң онц темдглв.

Нертә үүлдәчин дү күүкнь Эрнҗәнә Натальян келсәр, ахнь өрк-бүлдән цугтаднь үлгүр болҗ йовла, үүдәвр болһнь төрскнч седклинь, хальмг нутгтан дурта болдгинь медүлҗәнә гиҗ заав. Керг-үүлдврт орлцсн улст ханлтан өргҗ цугтаднь эрүл-менд болн цаһан хаалһ дурдв.

Хальмг Таңһчин Толһачин селвгч Салыка Владимир болн таңһчин Залврин вице-премьер Цернә Эрднь олна үгд багтҗ, Николай Джамбуловичин нерн мана нутгин тууҗд алтн үзгүдәр бичгдҗ мөңкинд үлдхмн гив.

Санҗин Николай зокъялч, һардач, редактор, олна үүлдәч болсн деерән сойлын номин кандидат, Хальмг ик сурһулин багш бәәсинь бас цуһар меднә. Б.Б.Городовиковин нертә КалмГУ-н Хальмг келн-бичгин болн дорд үзгин шинҗллтин күрәлңгин һардач Лиҗин Мингиян тодлврарн хувалцв. Хальмг ик сурһульд «социальн-сойлын үүлдвр» нертә мергҗлиг Николай Джамбуловичин седвәрәр сексн билә. Мана таңһчд сойлын халхар медрл өгдг ик сурһуль уга болад, селәдт көдлх сойлын мергҗлтнриг белддг болв. Баһ наста аспирант бәәсн цагтм Николай Джамбулович нанд нилчән күргсиг бас тодлнав, гиҗ Мингиян Алексеевич келв. Тер мет таңһчин сойлын болн зуульчллһна министерствин әңгин һардач Лялинә Баира, Элст балһсна сойлын Заллтын һардач Эрднин Данзн, таңһчин бичәчнрин ниицәнә гешүд Канкан Эрднь, Бадака Татьяна, Шуурһна Раиса, дунд болн ик сурһульмудт хамдан сурч йовсн үүрмүднь Долян Николай, Санҗин Сергей – цуһар Николай Джамбуловичин тускар бүлән үгән келҗ, тодлврарн хувалцҗ ач-тусинь хәрүлв.

Онц темдглхд, керг-үүлдврин йовудт Сарпан района муниципальн бүрдәцин толһач Манҗин Басңгин тогтаврар Аршан-Зелмнә дунд сурһульд Санҗин Николайин нерн зүүлһгдсн болдг. Дунд сурһулин хорад Николай Джамбуловичд нерәдсн һәәхүл бүрдәгдв. Энд дегтрмүднь, зургуднь үзүлгдв. Керг-үүлдврин йовудт сурһульчнр Санҗин Николайин шүлгүдинь хальмг болн орс келәр айслулҗ умшв. Элстәс ирсн гиичнр дунд сурһульд белгүдән белглв.

Ончта йовдл давҗасн цагт үүлтә хар теңгрт генткн нарн мандлад, һаза йосндан дуларсн болв. Аршан-Зелмнә медәтнрин келсәр, Санҗин Николай цаһан саната, тевчңгү күн бәәснд теңгрин бәәдл чигн тиигҗ хүврҗ одв. Хальмг Таңһчин хәәртә үрн Санҗин Николайин насн-җирһлнь нег һазра улст, дорас өсч йовх баһчудт даңгин үлгүр-үзмҗ болхнь лавта.

КАРСАНА Евгения

Видео