Эмнлһнә халхар көдлх санатаһар

21-02-2023, 22:21 | Общество, Таңһчин зәңгс

Сурһульчнрт тааста эрдм шүүҗ авхд дөң болхин болн эмнлһнә халхар ик сурһульд орхд белдвр кехин төлә «Мини иргч эрдм» гидг төсв батлгдв. Эн төсв П.Жемчуевин нертә таңһчин эмнлһнә ах эмч Калан Александрин болн Хар Һазра района Басңга Баатрин нертә Комсомольск гимназин һардач Батыра Маринан седвәрәр батлгдв. Шидр гимназин сурһульчнр эн төсвин медлд таңһчин эмнлһнд ирәд, әңгүдин үүлдврлә таньлдв.

Күүкд-көвүд химико-биологическ классмудт сурчана, иргчдән эдн эрүл-менд харлһна көдләчин эрдм шүүҗ авхар зуралҗана. Сурһульчнр гемтә улсиг орулҗ авдг, реабилитацин болн физиотерапевтическ, месллһ келһнә әңгүдин болн эмнлһ авчах улсин төлә эм кедг аптекин үүлдврлә таньлдҗ, энд ямаран эмнлһ кедгиг, дөң күргхин төлә ямаран кергсл олзлгддгиг хәләв.

– Хальмг Таңһчин Толһач Хаска Батун ач-тусар Б.Б.Городовиковин нертә ик сурһульд эмнлһнә дацң секгдв. Таңһчин эрүл-менд харлһна министерствин дөңгәр бидн гимназьла бооца батлвидн, терүнә медлд сурһульчнриг мана эмнлһнә әңгүдин үүлдврлә таньлдулҗ, иргч эрдмин тускар медүлхвидн. Күүкд-көвүд фармацевтическ болн әңгүдин үүлдвриг эврә нүдәрн үзҗ, эрүл-менд харлһна көдләчин эрдм шүүҗ авхин төлә ямаран некврмүд бәәхиг медҗ авх. Эн төсв сурһульчнрт иргчдән тааста эрдм шүүҗ авхд туслх, – гиҗ Александр Александрович келв.

Басңга Баатрин нертә Комсомольск гимназь өдгә цага бүрдәц болна. Энд сурһульчнр иргч эрдм шүүҗ авхд дөң күрглһнә көдлмшт һол оньг тусхагдна. Гимназин һардач Батыра Маринан темдглсәр, эн төсв хойр дундур җилдән күцәгдхмн гиҗ зуралгдҗана. Эн цагин эргцд эрүл-менд харлһна халхар эрдм шүүҗ авхар седҗәдг сурһульчнр сар болһн таңһчин эмнлһнд оддг болхмн.

Гимназин 10-ч класст сурчадг Дорҗин Делег, Гоҗин Байр болн Чопана Лаура эн төсв эднд таасгдсиг темдгләд, иргчдән эмчин эрдм шүүҗ авхар зуралҗахин тускар хувалцв. «Эмч әмтнд дөң күргдг буйнч седклтә күн болна. Тегәд бидн сурһулин хөөн бас әмтнд дөңгән күргҗ, туста болхар бәәнәвидн. Таңһчин эмнлһнә әңгүдт одад, гемтә улс ямаран таалд эмнлһ авчахинь, эднд ямаран эмнлһ кеҗәхинь хәләсн деерән энд эм кедгиг үзҗ медвидн. Эн харһлт иргчдән эрдм шүүҗ авхд эрк биш туслх», – гиҗ гимназистнр темдглв.

Эн төсв «дунд сурһуль – эмнлһн – ик сурһуль» гидг залһлда батруллһна халхар күцәгдҗәнә. Хар Һазра района сурһуль-эрдмин бүрдәцсин сурһульчнр терүнд орлцҗ иргчдән сән мергҗлтнр болхнь маһд уга гиҗ сангдна.

Барт белдснь БАТАН Сәәхлә
ЗУРГТ: гимназистнр таңһчин эмнлһнә әңгүдин көдлмшлә таньлдҗана

Видео