Икр күүкд нег-негән хәәнә

21-02-2023, 22:24 | Общество, Таңһчин зәңгс

Күн болһнд җирһлднь негн болв чигн сән үр бәәх зөвтә. Бәәсәрн хувалцдг, байр-зовлңгиг хамдан дааҗ һардг, түрүн дуудврар күрәд ирдг үр өөрхн элгн-саднас деер болна. Зәрмдән тиим ицлтә үр-иньгиг олҗ авхд амр биш. Икр бичкдүд һарсн цагасн авн насн-җирһлиннь туршарт хамдан бәәҗ, нег-негән хәләһәд, удан салҗ хол бәәҗ чадхш.

Муузран Инна хойрдад саата бәәсн цагт эмч энүнд шинҗллт кеснә хөөн икр бичкдүд һарһиг келхлә, эн алң болсн уга. Юңгад гихлә экнь икрин өрәсн болна. Экнь Наталья болн наһцхнь Дмитрий Ивановихн бичкнәсн авн мел хамдан нааддг бәәсмн, эгчнь шулун-шудрмг болдг төләдән дүүһән хәләдмн. Өсәд-босад өрк-бүлтә, күүкдтә болсн бийнь эдн нег-негән оньгасн алдлго бәәдл-җирһләрнь соньмсдмн. Күүкнь хәрд һарад, көвүнә хөөн икр күүкдтә болхлань Наталья байрлҗ, зеенрнь бас энүг дураҗ хамдан өсч нег-негән хәләҗ йовх гиҗ санв. Карина болн Аделина күүкд зуурм һарв, тегәд эдн сардан эмнлһнд бәәв. Цогц-махмудан батрулхин төлә ирлцнгү эмнлһ авх кергтә болв. Карина һархдан хойр киил татв, Аделина болхла күсдундур киил билә, тегәд эдн эмчнрин хәләврт бәәв. Таңһчин бичкдүдин эмнлһнә эмчнр эднә эрүл-мендин төлә цугинь кев. Нег үлү чиңнүрнь баһ болснас иштә Аделинад шишлң эмнлһн керглгдв. Ода эдн йистә, сурһулян сәәнәр сурна, спортар соньмсҗ бөк бәрлдәнә секцд орна. Экиннь келсәр, эдн мел хамдан бәәнә, хоюрн герин даалһвран кенә, сул цаган давулна, сурһулин керг-үүлдврмүдт шунмһаһар орлцҗ, билг-эрдмәрн ончрна. Карина Аделина хойр Әрәсән сурһульчнрин ниицәнә гешүд болна, тегәд эдн эн олна бүрдәцин үүлдврт орлцҗ олна нүүрт йовна. Тимофей ахасн үлгүр авч күүкд самбо бөк бәрлдәнә секцд ордг болв. Келхд, эдн балһсна болн таңһчин бәәтхә, Өмн үзгин округин болн Әрәсән марһаст орлцҗ дииләчнрин тоод йовна.

– Икр бичкдүд хамдан бәәдг болв чигн эдн хоорндан йилһрнә, заңгнь болн авг-бәрцнь чигн бас әдл болхш. Аделина биилхдән дурта, эн билгтә күүкн, үүл бәрнә, Карина болхла ду дуулхдан таасна, эн сурһульдан һавшун, иргчдән спортын халхар ик күцәмҗ бәрх күслтә. Дәкәд эдн хоорндан марһлдна, талдан хувц өмсҗ йилһрхәр шунна. Мана күүкд бичкн цагтан әдл хувц өмсхдән таасдго билә, ода болхла эдн нег-негән дурахар седнә. Күүкд хоорндан сәәнәр таарна, эдн эврәннь хорадан үүл бәрҗ, ямр нег тааста керг күцәхдән дурта. Эдн җирһлиннь хаалһдан нег-негән хәләҗ, хамдан йовх гиҗ би нәәлҗәнәв. Ээҗнь икр дүүтәһән өөрхн улс болҗ альд йовв чигн нег-негән сандг төләд эдн бас бат залһлда бәрҗ, ээм-ээмән түшҗ хамдан йовхнь ик байр үүдәнә, – гиҗ Инна экнь келнә.

Муузран Карина болн Аделина Элст балһсна 17-ч тойгта дунд сурһульд сурна. Эдн олн үр-иньгүдтә, хамдан сурчадг болн секцд ордг күүкд-көвүдлә цаган сергмҗтәһәр давулна, олн зүсн керг-үүлдврт болн марһаст орлцна. Болв тер бийнь эдн хоюрн ю-бис күүндҗ, нег-негнләһән ухан-тоолврарн хувалцҗ хамдан бәәх цаг олна. Эднә хаалһнь цаһан болтха, гиҗ дурдҗанавидн.

БАТАН Наталья
ЗУРГТ: Муузран Карина
болн Аделина

Видео