Ке-сәәхн кегдлмүд кеҗ һарһна

28-02-2023, 22:42 | Общество, Таңһчин зәңгс

Күн болһнд тааста керг бәәнә. Зәрмдән кен-негнднь нам хойр-һурвн тааста керг бәәнә. Эврә һарарн юм уйх, ке хувц өлгх болн олн зүсн сәәхн кегдлмүд кех – эннь нурһлҗдан күүкд улсин тааста керг болна.

Яшкуль селәнд бәәдг Тамара Калабуховаг нег һазра улс сәәнәр меднә. Эн һартан өөтә күүкд күн олн зүсн кегдлмүд кедгинь үзхлә өврмҗтә болна.
Тамара Викторовна эрүл-менд харлһна халхар көдлнә. Дөчн шаху җилдән Яшкулин эмнлһнә медицинск эгчәр көдлсмн. Медәтә эк-эцкнь гемнәд, Тамарад көдлмшәсн һарх кергтә болв. Мел тер цагла энүнд олн зүсн кегдлмүд кех дурн үүдв. Нег дәкҗ эн интернетд торһн эдәс күүкд улс үсән торһдг сәәхн кегдл яһҗ кедгинь үзәд бас кехәр седв. Үүнәс экләд хөөннь олн зүсн кегдлмүд кедг болв. Арсн, шил, цаасн, торһн эд, суңһуг.., ю эс эн олзлҗ кегдлмүдән кеҗ һарһна. Кесг җил хооран Т.Калабухова арснас сәәхн цецг кеһәд Москваһур нег марһанд поштар йовулв. Марһана жюрин гешүд энүг әмд цецгиг таслад, хагсаһад, марһанд илгәв гиҗ медв. Иигәд Тамаран көдлмшиг учртан авсн уга. Икәр зовсн угав, юңгад гихлә кегдлмүдән өөрхн улстан, үүрмүдтән даңгин нерәдҗ белглнәв, гиҗ Тамара Викторовна келнә. Өдгә цагт эн декупаж эв-арһар соньмсҗ кегдлмүдән кенә. Хуучн дорва, хәәрцг чигн энүнә һарт хүврәд шин бәәдлтә болна. Анна, Вероника хойр ач күүкндән ке-сәәхн хувц бас уяд һарһхдан дурта. Ачнрнь ээҗин уйсн бүшмүд өмсҗ, иим хувцн нань талдан улст уга гиҗ кеерәд байрлна.

Терүнәс нань Тамара Викторовна зург цокх, зурх бас дурта. Зурсн зургудтнь сансрин төр үзҗ болхмн. Тер мет герин эзн күүкд күн шимтә, сенр хот болһхдан дурлна. Хойр җилдән Т.Калабухова Яшкулин хаалһин хаҗуд бәәдг кафед көдлдг болв. Тенд һуйрар зүсн-зүүл хот кенә. Тамара Викторовнан болһсн болн шарсн хотыг кафед даңгин ирдг улс таасҗ авна, гиҗ темдглх кергтә. Экнь болн хадм экнь сәәһән хәәсн хөөн мел эн кафед ирҗ көдлв.

Эврәннь тааста кергәрн олн-әмтнд байр үүдәҗ, тусан күргҗ йовна. Ямр чигн хуучн юмн Тамара Калабухован алтн һарт хүврәд, өңгән соляд күүнә нүд байрлулна. Йосн илвч мет эгл тоотыг өвәрц юмнд хүврәнә. Ниигмин сүлҗәнд эврәннь кегдлмүдән олн-әмтнд эн үзүлнә. Эн билгтә күүкд күүг Сергей Петрович авальнь болн Александр, Алексей хойр көвүнь даңгин дөңннә. Кегдл болһна йовудынь хәләҗ, ашинь үзхлә эдн олн-әмтнлә хамдан өврәд бәәнә. Тиим билгтә, алтн һарта күүкд күн кегдл болһндан седклән тәвҗ кен-негнднь ке-сәәхн тоотан нерәднә.

КАРСАНА Евгения

Видео