Арвтнрт сән сурһмҗ өгхәр зүткнә

02-03-2023, 15:04 | Общество, Таңһчин зәңгс

Урдк җилин чилгчәр Хальмг Таңһчин Толһач Хаска Бату МВД-н көдләчнрин көдлмшинь үнлҗ болн эдниг урмдулхин төлә шишлң мөрә өгхәр шиидәд зәрлг батлсн билә. Эн җилин туула сард көдлмштән күцәмҗ бәрсн нәәмн көдләч шин мөрәһәр ачлгдсн болдг. Тедн дунд Элст балһсна дотр-дундын кергүдәр үүлддг Заллтын насни дигт күрәд уга арвтнрла көдлдг әңгин ах инспектор Канкан Борис заагдв.

Майор Канкаев полицд 2003-ч җилд ирҗ, эн җилин намрар дигтә хөрн җил болхмн. Тегәд эн җилд көдлмшинь өөдәнәр үнлснь темдгтә, гиҗ келх кергтә. Борис Михайлович Октябрьск района Цаһан Нур селәнд өсч боссн көвүн. 1999-ч җилд дунд сурһулян төгсәһәд, Хальмг ик сурһулин Хальмг келн-бичгин болн сойлын дацңд орҗ сурв. 2001-ч җилд цергт мордад, Чеченск Республикин Урус-Мартан балһснд тусв. Хойр җилдән цергләд, чаңһ-чиирг залу болад, цергәсн бууҗ ирәд, Элстин ГОВД-н ППС-т күч-көлснә хаалһан эклв. Көдлн бәәҗ, 2007-ч җилд Хальмг ик сурһулян төгсәһәд, багшин эрдмин хату цаасан авад, Элст балһсна дотр-дундын кергүдәр үүлддг Заллтын насни дигт күрәд уга арвтнрла көдлдг әңгд экләд церглв. Энд дамшлтан хоршаһад, көдлмшән даавртаһар күцәһәд, 2011-ч җиләс авн эндр күртл әңгин ах инспекторар церглҗ йовна.

Канкан Борисин келсәр, арвтнрла көдлхд амр биш. Сүл җилмүдт арвтнр Интернетд өдр-сө уга сууһад, керго тоот олар хәләнә. Кесг җил хооран «Синий кит» нертә наадыг арвтнр олар хәләһәд, энүнә зокалар бийән әмнәс хаһцулх аюл һарһдг билә. Эн әәмшгтә наадна тускар эк-эцкнр соңсҗ, йосндан әәһәд зовсн бәәҗ. Сурһуль-эрдмин бүрдәцсәр, ПДН-на әңгин көдләчнрин орлцлһтаһар олн хург давҗ, эн йовдлас гетлхин төлә керг-үүлдврмүд бүрдәгдв. Терүнәс нань балһснд болн селәдт бәәдг баһ наста көвүд-күүкд хоорндан даңгин ноолдад бәәдгинь нуувч биш. Дунд сурһулян төгсәһәд, Элстд ирәд, цааранднь сурһулян сурад, энд хувагдад бәәдгинь авъяст тохрв гиҗ келҗ болхмн. Тер мет дунд сурһульмудт сурчадг көвүд-күүкд кичәлмүдин хөөн лавкст одад, кампадь-балта, талдан чигн эд-тавр хулхалдг болв. Нурһлҗдан йистә-арвта күүкд-көвүд иим хулха кенә. Иим сурһульчнрин эк-эцкнрлә, багшнрла күүндвр тогтагдна. Талдан олн зүсн йовдлмудын тускар келхлә цаг күртшго, гиҗ ах инспектор Канкан Борис келнә.

ПДН-на көдләчнрин көдлмшнь өвәрц болдгинь цуһар меддг болх, юңгад гихлә арвтнрла күүндхәр седхлә сурһмҗлачин чигн, багшин чигн шишлң эв-арһ медх кергтә болна. Баһ наста арвтнр үлмәд орна, тегәд түрүн саамд өөрхн улснь, нег үлү эк-эцкнь үрдтән онц оньг тусхах зөвтә, гиҗ Борис Михайлович темдглнә. Өдр болһн асхар гертән цуһар хурсн цагт үрдтәһән күүндәд, өдрән яһҗ давулсинь соньмсх кергтә. Тиим күүндврин йовудт көвүд-күүкд эк-эцкиннь талас килмҗнь медәд, эврәннь үүрмүдин, хамдан сурч йовх арвтнрин тускар келҗ өгнә.

Дәкәд немхд, арвтнр гертән хонлго хойр-һурвн өдртән геедрв гисн зәңгс бас дару-дарунь соңсгдна. Иим йовдлмуд Элстд бас учрна, нурһлҗдан үрн эк-эцктәһән керлдәд, эднән әәлһхин төлә үүрмүдтән хонад, кесг өдртән зәңг-зә угаһар сууна. Эн туст ПДН-на мергҗлтнр өдр-сө уга идхән-уухан мартад көдлнә. Тиим болн деер келгдсн талдан йовдл учршгон төлә, насни дигт күрәд уга арвтнрла көдлдг әңгин мергҗлтнрин һол кергнь болдг. Сурһуль-эрдмин бүрдәцсәр эдн даңгин йовҗ, багшнрт болн эк-эцкнрт ирлцңгү төрмүдәр илдклмүд кеҗ, соньмсулҗадг сурврмудт хәрү өгнә.

Майор Канкан Борис көдлмштән дааврта, тоомсрта, дамшлтта мергҗлтд тоолгдна. Гертән болхла күндтә, дурта аваль болн эңкр эцк болна. Саглр авальтаһан Энкира үрән өскв. Өдгә цагт күүкнь Т.Хахлынован нертә Элстин медицинск колледжин хойрдгч курсин оютн мөн. Өөрхн улснь амр биш көдлмшинь медәд, герин эзән ямр чигн сурврт даңгин дөңннә. Ах инспектор Канкан Борис Хальмг Таңһчин Толһачин мөрән түрүн лауреатмудын тоод орснлань йөрәҗәнәвидн. Көдлмшнь цааранднь өмәрән йовҗ, насни дигт күрәд уга арвтнр зөв-йос эвдлго таңһчиннь хәәртә үрд болҗ өслһнд тусан күргҗ, олнд үлгүр болҗ йовхиг дурдҗанавидн.

КАРСАНА Евгения

Видео