Цергчнриг болн олн үртә улсиг дөңнхәр

04-03-2023, 11:19 | Общество, Таңһчин зәңгс

Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина таңһчар заллһна төвин (ЦУР) улд болсн «шуд эфирт» олн үртә өрк-бүлмүдиг, шишлң цергә керг-үүлдврт орлцачнриг дөңнлһнә керг-үүлдврмүдин, эн җиләс авн мана орн-нутгт өггдҗәх негдсн социальн демин мөңгнә болн нань чигн төрмүдәр цәәлһвр өгв.

Дааврта һардачин темдглсәр, 2022-ч җилд таңһчин бюджетәс әмтнд социальн дөң күрглһнд, демин мөңг өглһнд 3 җува 460 сай арслң йилһгдв. Җил ирвәс социальн төрмүдт йилһгдҗәх мөңгнә кемҗән икдәд йовна, тиигәд 2019-ч җиллә дүңцүлхлә тер кемҗән хойр холванд өсв. Давсн җилин моһа сард зәрм улст гертнь газ оруллһнд дем күрглһнә туст немр керг-үүлдврмүд батлгдсн билә. Түрүләд һаруг даңцалһна демин мөңгн 25 миңһн арслң бәәсмн, хөөннь Әрәсән Президентин даалһврас иштә бар сарас авн тернь 100 миңһн арслң болв.

- Шишлң цергә керг-үүлдврт орлцачнриг болн теднә өрк-бүлмүдиг дөңнлһнә төрт ик оньг тусхагдҗана. Хальмг Таңһчин Толһачин зәрлгәс иштә СВО-д орлцачнрин өрк-бүлмүдт нег дәкҗ өгдг демин мөңгн батлгдв, тер мет шав авсн болн әмнәсн хаһцсн орлцачнрин өрк-бүлмүдт бас демин мөңгн йилһгднә. 2022-ч җилин хулһн сард батлгдсн таңһчин заканас иштә шишлң цергә керг-үүлдврт орцлачнрин өрк-бүлмүдиг дөңнлһнә туст немр шиидвр авгдв. Тиигәд эднд жилищн-коммунальн туслмҗин һаруг даңцана, бичкдүдт сар болһн халун хотар тетклһнд 1200 арслң өггднә, цергчнрин күүкд немр сурһулин бүрдәцст үүлддг секцст болн кружокд өңгәр орҗ чадҗана, бичкдүдин садт эдниг чеерүд угаһар авна, эмнлһнә болн амрлһна путевксар теткнә. Тер мет цергчнрин бичкдүд сард нег дәкҗ өңгәр музейд, театрт одҗ чадҗана, – гиҗ Марина Петровна келв.

Нилхд төрлһиг урмдулхин болн олн үртә өрк-бүлмүдиг дөңнхин төлә таңһчд бас чинртә керг-үүлдврмүд күцәгдҗәхин тускар Өлзәтин Марина онц келв. Тиигәд, Хальмг Таңһчин Толһач Хаска Батун шиидврәр эн җиләс авн нилх болһнд белг белглнә. Белг болһнд 35 эд-тавр, хувц-хунр болн нилхд керглгдх кегдлмүд бәәнә, терүг хулдҗ авхд 20 миңһн арслң һарһгдна. Олн үртә өрк-бүлмүдиг дөңнлһнә туст батлгдсн шинрлтс эн җилин эклцәс авн күцәгдҗәнә. Үлгүрнь, үрнь дунд шишлң сурһульд мөңгән өгәд сурчадг болхла җилд 20 миңһн арслңгинь даңцадг болхмн.

Негдсн социальн демин мөңгиг эн җиләс авн Әрәсән социальн саң өгчәнә. Энүг саата күүкд улст болн 17 нас күрәд уга бичкдүдт өгнә, болв өрк-бүлин олз-орунь учртан авгдна. Демин мөңгнә кемҗән баһ гиснь 6742 арслң тогтана.

- Мана таңһчд олн үртә өрк-бүлмүдиг, баһ тетквртә улсиг дөңнлһнә кергт ик оньг өггднә. Давсн җилд эн кергт баңһчин бюджетәс 2 җува 400 сай арслң йилһгдв. Олн үртә өрк-бүлмүдин бичкдүдт халун хотар тетклһнд 1000 арслңгин ормд ода 1200 арслң өгдг болв. Сурһулин шин җилин өмн өргнд олн үртә өрк-бүлмүдт асргдҗах бичкдүдт хувц-хунр хулдҗ авхд күн болһнд 5000 арслң йилһгднә. Экин региональн сертификатыг олзта-тустаһар олзлҗ өрк-бүлин төрмүд хаһлхин төлә бас сольврмуд орулгдна, – гиҗ министр темдглв.

ДООҖАН Наталья

Видео