Төрскн келән дасий!

04-03-2023, 11:41 | Общество, Таңһчин зәңгс

Шидр Хальмг Таңһчин Залврин Герт «2023-ч җилин төрскн келнә сән гисн багш» нертә түрүн болҗ давулгдсн таңһчин марһана ашинь дигләд, дииләчнрин болн лауреатмудын нернь заагдв.

Таңһчин келн-улсин сурһуль-эрдмин тууҗд эн марһан ончта йовдл болҗ давв. Региональн девсңд ончрсн багш болн сурһмҗлач цааранднь Цугәрәсән марһанд орлцхмн. Багшнр энүнә йовудт хоршасн цуг дамшлтан, медрлән олн эв-арһ олзлҗ билгән үзүлв. Орлцач болһн жюрин гешүдт яһҗ төрскн келиг дорас өсч йовх үйнрт дасхдган сән гидгәр үзүлсн болдг.

Марһана ашар 2023-ч җилин төрскн келнә сән гисн багшин нерн Яшкулин района Улан Эргин дунд сурһулин багш Байр Долгаевад зүүлһгдв, «2023-ч җилин бичкдүдт төрскн кел хамгин сәәнәр дасхдг сурһмҗлач» гидг номинацд болхла Элст балһсна 16-ч тойгта «Бадм цецг» бичкдүдин садын сурһмҗлач Светлана Каруева диилвр бәрв. Хойр дииләч 50 миңһн арслңга сертификатар ачлгдв.

Хальмг Таңһчин Залврин һардачин дарук Андрей Чиджиев хурсн багшнриг таңһчин һардврин нерн деерәс иим ончта йовдлла йөрәв. Андрей Улюмджиевичин келсәр, марһан нарт-делкән төрскн келнә Өдрлә болн Цаһан Сарин байрла ирлцүлҗ давснь темдгтә болв. Марһана бүрдәһәчнрт,дииләчнрт,цуг орлцачнрт ханлтан күргв. Терүнәс нань эн керг-үүлдвриг дөңнснднь Хальмг Таңһчин Толһачд онц ханлтан өргв.

Таңһчин сурһуль-эрдмин көдләчнрин дамшлт өөдлүллһнә күрәлңгин һардач Лилия Мунчинован темдглсәр, төрскн келнә багшнрин көдлмш тууҗлгч чинртә, юнгад гихлә эднә нилчәр мана бичкдүд садмудт болн дунд сурһульмудт төрскн келән дасад, тууҗан болн сойлан сәәнәр медҗ авна гив.

Хальмг Таңһчин сурһуль-эрдмин болн номин көдләчнрин профсоюзин бүрдәцин һардач Антонина Коокуева марһана дииләчнриг йөрәҗ, цаһан хаалһ дурдҗ, бүлән үгән бас нерәдв.

Марһанд хойрдгч болн һурвдгч ормс эзлсн багшнр арвн миңһн арслңга сертификатар ачлгдв. Тедн дунд Рая Улюмжанова (Приютное селән), Антонина Босханджиева (Элст балһсн), Людмила Ботаева (Лагань балһсн) болн Цаһан Боярова (Троицкое селән) ончрв. Марһанд орлцсн талдан багшнр болн сурһмҗлачнр Күндллһнә һашгудар болн дипломсар темдглгдв.

2023-ч җилин төрскн келнә сән гисн багшин нер зүүсн Байр Долгаеван келсәр, эн марһанд орлцсндан байрта бәәнә. Кесг өдрин туршарт таңһчин багшнрла таньлдҗ, дамшлтарн хувалцҗ, цуһар нег-негән дөңнҗ көдлвидн. Марһана йовудт медҗ авсн тоотан көдлмштән эрк биш олзлнав, гиҗ Байр Борисовна келв.
Һучн долан җилдән багшар көдлв чигн, тер бийнь марһанд орлцад олн соньн, өдгә цагин некврлә ирлцҗәдг тоотла таньлдсн биләв. Цуг орлцачнр сән белдвртә ирснь ил медгдв. Диилвр бәрсн багшнрт намртан болх Цугәрәсән марһанд күцәмҗ дурдҗанав, гиҗ Октябрьск района Н.Санджировин нертә Цаһан Нуура дунд сурһулин багш, марһана лауреат Александра Канюшева келҗ, цугтаһинь йөрәв.

Баахн дуучнр Санл Мукаев болн Артем Мулаев, тер мет Элст балһсна 12-ч тойгта дунд сурһулин «Улан залата хальмгуд» ансамбль багшнриг эврә билгәрн байрлулв.

Сүл җилмүдт баһчуд төрскн келән мууһар меддгнь нуувч биш, тегәд иим билгтә,дамшлтта багшнр эдниг дасххла, хальмг келнә чинр өөдләд бәәх гиҗ сангдна.

КАРСАНА Евгения

Видео