Улан Удэ балһснд – соньн һәәхүл

04-03-2023, 10:34 | Общество, Таңһчин зәңгс

Бурятин хотл балһснд өвәрц төсв күцәгдв. Дәәнә шишлң операцд орлцҗах цергчнрин гергдт нерәдсн зургудын һәәхүл Улан Удэ балһснд секгдв
Давсн сарин 18-д соньн эн һәәхүлин презентац болв. «Бурятин баатрин гергн» гиҗ нерәдгдсн һәәхүл олн улсин оньг эзлв. «Көгҗмән татад, Диилвр бәрхмн» гисн дуудвртаһар болсн буйнч седклин концерт-марафона йовудт эн һәәхүл секгдлә.

Әрәсәд делгрлт авчах «Баатрмудын гергд» гидг төсв Самарск областьд, Бурятьд күцәгдв. Бурятьд эн төсв республикин правительствин дөңгәр, «Цугәрәсән олн-әмтнә фронт» гидг җисәнә республиканск әңгин орлцлһтаһар күцәгдв.

Бурять Республикин сойлын министр Соелма Дагаева, Цугәрәсән улсин фронтын Бурятин региональн әңгин штабин ахлач Марина Аникьева, нань чигн улс һәәхүлиг секлһнд йөрәлин үг келв.

Төрскән харсачин өдрлә цуглрсн улсиг йөрәһәд, орн-нутган харслһнд боссн баатрмудын авальмудын чинринь темдглхәр кегдсн төсвин чинриг цугтан темдглв. Өрк-бүлмүдин чинриг үзүлгч, өсч йовх бичкдүдт үлгүр болх эн керг-үүлдвриг ик зуудан баатрмудын авальмуд бийснь белдҗ, әмтнд үзүлснь нег үлү олн дунд тааслт олв.

Баатрин авалнь болҗах Оксана Дашиева, зургудын эн һәәхүл бүрдәсмн. Ни-негн Төрскнәннь төлә цергин ханьд дәәллдҗ йовх залустан урмд өгхәр, энд үлдсн өрк-бүлнь, үр-өңгнь, күүкд-көвүднь – цугтан тедниг мартлго Төрскән харсачин өдрлә үнн седкләсн йөрәҗәхән Оксана Дашиева эврәннь үгдән медүлв.
Һәәхүлд 50 күүкд күүнә дүр үзүлгдҗәнә. Тедн цугтан залусиннь цергә хувцтаһар зурган цокулснь соньн. Зургудын өөрнь цергчнрин бичсн бичгүд тәвҗ үзүлгдҗәхнь седкл уйдулна.

Залу гергн хойриг хамднь зурсн зургудын әңг чигн әмтнә оньг авлна. Тер зургудыг зурач болн кинорежиссер Солбон Лыгденов зурсмн. Эн билгтиг Хальмгт меднә. Сибирск дивизин туск фильмдан Солбон Лыгденов 110-ч Онц Хальмг мөрн цергә дивизин туск әңгиг орулсмн.

Видео