Экин зүркн эвлүн дурар дүүрң

07-03-2023, 10:42 | Общество, Таңһчин зәңгс

Моһа сарин 8 күүкд улсин сән Өдр. Баһ Дөрвд селәнд бәәдг олн үртә Годжаевихнә өрк-бүлд өрүн көдлмшиннь болн сурһулин өмн цуһар ширәһән эргҗ хамдан цәәһән ууҗ байрин өдриг эклнә. Герин эзн Сарң Владимирович тавн көвүтәһән эңкр авалян Җирһл Анатольевнаг болн ор һанцхн күүкән Маринаг йөрәҗ, шикр-балтаһар эдниг тоона. Эннь эднә өрк-бүлд сән авъяст тохрв.

Хөрн җил хооран өрк-бүлән өндәлһсн Сарң Владимирович болн Җирһл Анатольевна күүкдтән чик сурһмҗ өгч, чик авг-бәрцәр бәәҗ, хальмг улсин авъяс-заңшал күндлҗ сән үрд болҗ өсхд ик оньган өгнә. Келхд, олн үртә эцк бийнь насн-җирһлиннь туршарт спортар соньмсна, тегәд эн көвүдтән үлгүр болна. Сарң Годжаев урднь района «Җаңһр» командын ханьд хойр дәкҗ Әрәсән чемпион болсмн. Эндр эн Баһ Дөрвдә района ДЮСШ – һардҗана, спорт делгрүллһнд ик тәвцән орулҗана. Эцкиннь үлгүрәр көвүд цогц-махмудан батрулҗ, спортар соньмсна, района болн таңһчин нериг өөдән бәрҗ йовна. Ууһн Шовшур сурһулян алтн медаляр төгсәһәд, ода ик сурһульд цергә эрдм дасчана, эн бөк бәрлдәнә халхар ик күцәмҗ бәрҗ йовсмн, спортын мастерин кандидат болна. Дава, Бадм болн Бата сурһульчнр, бас бөк бәрлдәнә спортар соньмсна. Шевельдан 5-ч класст сурна, эн йилһән сән сурһульч, шатр наадхдан дурта, района болн таңһчин марһаст орлцна. Отхн Марина бичкдүдин садт орна, күүкн теннис нааддгиг дасх саната. Эн җил эн сурһульд орхмн, тегәд ода белдвр кеҗәнә. Җирһл Анатольевна бас эднәс ард үлдхш, күүкд күн сул цагтан волейбол наадна.

Олн үртә эк көдлмшиннь хөөн чик авг-бәрцәр бәәҗ спортар соньмсх цаг олсн деерән һуйрин зүүтә хот-хол болһхдан дурта. Марина экән дахад әмтәхн кегдлмүд болһдгиг дасна. Дәкәд эдн дулан цагт өрк-бүләрн кеер һарч, хальмг тег һәәхәд, цаган тустаһар давулна. Эдн хамдан ду дуулҗ, олн зүсн наадд наадад амрна. Көвүд сурһулин хөөн секцд одад, хәрҗ ирхләрн эк-эцкдән герин көдлмш кехд дөң болна. Олн үртә өрк-бүл дөңцл эдл-аху бәрҗ, һаха, така асрна. Тегәд көвүд бичкнәсн авн герин мал асрҗ чадна.

– Би «Байр» гидг бичкдүдин садт сурһмҗлачар көдлнәв, тегәд күүкд-көвүдлә эртәснь экнртән олн зүсн сәәхн кегдл кеҗ, ду-би дасч билг-эрдмән үзүлнәвидн. Күүкд улсин сән Өдрт экнр болн ээҗнр ирҗ, бичкдүдин концертд орлцна. Мана көвүд бичкндән бас нанд эврән кегдл кеҗ белглдг билә, би теднинь ода чигн әрүнәр хадһлнав. Эк болһнд үрнәннь күцәмҗ эврәннь күцәмҗәс хойр дам үнтә болн бахмҗта болдг. Мана зурһан үрн сурһулян сәәнәр сурч, билг-эрдмән делгрүлҗ, спортын халхар күцәмҗ бәрҗ йовхнь нанд ик байр-бахмҗ үүдәнә. Эдн хоорндан ниитә, нег-негндән дөң болхар адһна. Бидн асхнднь цуһар гертән цуглрад, өдр яһҗ давсна, ямаран шин зәңг бәәхин тускар хувалцнавидн. Эннь бас мана өрк-бүлин авъяс болад, хоорндан ниитә болхд туслна. Олн үр асрхд амр биш, болв эк-эцк хойр дуран болн килмҗән тусхаҗ, ни-негн бәәхлә, үрднь теднәс үлгүр авч нег-негән хәләҗ цаһан седклтә болна. Күүкд эрүл-менд бәәхлә, тааста керг олҗ күцәмҗтәһәр үүлддг болхла экин зүркн төвкнүн болдг, – гиҗ олн үртә эк келнә.

Моһа сарин 8-д дурта экән болн дү күүкән йөрәсн деерән көвүд хойр ээҗән бас йөрәнә. Сарң Владимировичин экнь Зинаида Очировна Музраева бас Баһ Дөрвд селәнд бәәнә, тегәд ачнрнь дару-дарунь ээҗдән гиичлҗ одна. Эн селәнә лавкд көдлнә, сул цагтан көвүн-бердән дөң болна. Җирһл Анаатольевнан экнь Любовь Дандыровна Довунова Октябрьск района Иҗл селәнд бәәнә, эн дунд сурһульд хальмг келнә багшар олн җилдән көдлҗәнә. Хойр ээҗнь ачнр-зеенртән теңкән уга дурта, эдн өлзәтә сән үрд болҗ өсчәнә гиҗ байрлна.

ДАВАН Наталья
ЗУРГТ: өнр-өсклң Годжаевихнә өрк-бүл

Видео