Зулын байрла йөрәв

09-12-2023, 09:10 | Общество

Зулын өдрин өмн өргнд Хальмг Таңһчин Толһач Хаска Бату Бурхн Багшин Алтн сүмд Шаҗн Лам Тензин Чойдакла харһв. Тер мет шаҗна халхар кесг төрмүдәр күүндв.

Шаҗн Лам Тензин Чойдакин келсәр, сүл цагт баһчуд хурлд олар ирдг болв, эннь йир сән йовдл мөн гиҗ темдглв. Харһлтын йовудт Бату Сергеевичин темдглсәр, шар шаҗн мана таңһчд делгрәд йовна, федеральн төв эн туст бас дөңгән күргҗәнә гив.
Зулын байрин өдрлә Хаска Бату төв хурлд болсн ик мөргүлд бас орлцв, таңһчин олн-әмтнлә хамдан Зуңква Гегәнд мөргәд насан утдулв. Тогтсн авъясар, хальмг өркбүл болһнд боорцган шарҗ, улан зандн цәәһән чанҗ, зулан өргҗ, өөрхн улстан ут нас сурҗ цуһар зальврна.
– Орҗах лу җил өлзәтә болҗ, авсн наснтн ут болтха, цуһар эрүл-менд, байрта-бахта, олна хормад багтҗ, амрч-җирһҗ йовтн! – гиҗ Хаска Бату нег һазра улсан йөрәв.

ОЛЬДАН Цаһан

Видео