Баатрмудын ач-тусинь темдглҗ

12-12-2023, 09:28 | Общество

Бар сарин 9-д мана орн-нутгт Төрскнә Баатрмудын сән Өдр темдглгднә. Хальмг Таңһчин Толһач Хаска Бату, Улсин Хуралын (Парламентин) Ахлач Артем Михайлов, Залврин Ахлач Босхмҗин Гилән болн зөв-йос харлһна бүрдәцсин һардачнр Элстд Мөңк һалын өөр болсн керг-үүлдврт орлцад гүрмр цецгүд тәвв.

Эн өдрлә Төрскнәннь төлә әмән өгсн цергчнрин санлынь тевчҗ, ач-тусинь хәрүлнәвидн. Төрскнә Баатр болһн маднд омг болна. Эндр цергә шишлң керг-үүлдврт орлцачнрт бас ханлтан өргҗәнәвидн. Андрей Кунаковин болн Лиҗин Мингияна нерд орн-нутгин тууҗд алтн үзгүдәр бичгдҗ орв, гиҗ Бату Сергеевич темдглв. Тер мет Советин Союзин болн Әрәсән Баатрмуд Очра Валерийин болн Гиндән Баатрин тәвцнь бас онц темдглсн болдг.
Терүнәс нань Ар Кавказд әәмшг уга бәәдл тогталһнд орлцсн улсин нердиг бас олнд тодлулҗ келгдв. Эндр цергә шишлң керг-үүлдврт орлцҗадг нег һазра мана салдсмудт ханлтан күргҗ медүлв.
Керг-үүлдврин йовудт Хаска Бату «Воин» төрскнч седклтә баһчудыг сурһмҗлдг Төвин сурһмҗлгчнрт болн тенд сурдг баһчудт «УАЗ» тамһта көлгнә түлкүр бәрүлҗ өгв.
Нарн өдрлә Элстин Сити-Чесст бәәдг Георгий Победоносцин чонҗд болсн керг-үүлдврт Бату Сергеевич бас орлцв. Тенд әмнәсн хаһцсн СВО-н орлцачнрин нерд бичәтә санлын самбрмуд әрвслгдв.
Эднә үлгүрәр мадн омг кеҗ, күн болһн даавртаһар көдлҗ, дор ормдан ончрҗ чадҗана, гиҗ Хаска Бату темдглв.

ОЛЬДАН Цаһан

Видео