Эндр Хальмг Таңһчин Өдр

12-12-2023, 09:31 | Общество

Эндр Москва балһснд ВДНХ-д «Әрәсә» гидг нарт-делкән һәәхүлд Хальмг Таңһчин Өдр болхмн. Ирсн гиичнриг Хальмг Таңһчин Толһач Хаска Бату тосад, таңһчин күцәмҗин тускар келҗ өгх. Тер мет ирсн гиичнриг хальмг улсин сойлла болн авъясмудла таньлдулхмн.

Өрүһәр нааран ирсн улс таңһчин фермермүдин яармд орлцҗ, сән чинртә эдл-ууш болн арһлачнр кеҗ-һарһдг эд-тавр хулдҗ авч чадхмн. «МаханФест» гидг керг үүлдврт гиичнр хальмг улсин хот амсхмн. Таңһчд зуульчллһ делгрүллһнә халхд күцәгдҗәх керг-үүлдврмүдин туск презентац болхмн, терүнд мана теегин ке-сәәхн йиртмҗин, бамб болн бадм цецгүдин наадмин тускар келгдх. Хальмг улс хүрм яһҗ давулдгин авъяс ирсн гиичнрт бас соньн болхнь лавта. Хуучн тод бичгин туск илдкл бас олна оньг авлх гиҗ сангдна.
Ду-бииһин академическ ансамбль «Бамб цецг» хальмг улсин сойлла болн баһчудын «Хагрин» гидг баг өдгә цага көгҗмлә таньлдулхмн. Улсин коллективс «Хальмг Таңһч – төрскн һазрм» гидг концерт бас үзүлхмн. Тегәд Хальмг Таңһчин Өдр байрта-бахмҗта кевәр давулгдхнь маһд уга.

БАТАН Наталья

Видео