Иньгллтин концерт

12-12-2023, 09:55 | Общество

Бичкдүдин үүдәлтин бәәшңд үкр сарин 25-д иньгллтин концерт болв. Терүнд үүдәгч хойр коллектив орлцв. Тернь Целинн района И. Самсонован нертә «Веселая карусель» ансамбль болн Элст балһсна С-Г. Дорджинә нертә 1-ч тойгта бичкдүдин көгҗмин сурһулин коллектив мөн. Эдн олн җил нөкцҗ үүлдҗәнә. Нөкцлтән цааранднь чигн батлад, үүдәгч үүлдврән улм ясрулх седклтәһәр үүлдҗәхин тускар хойр коллективин элчнр тоолвран медүлнә.

С.-Г. Дорджинә нертә бичкдүдин көгҗмин сурһулин һардач Лариса Летуева эн хамцу үүлдврин чинриг темдглв. «Мана билгтә бичкдүдиг үзхлә седкл байрар дүүрнә, - гиҗ Лариса Борисовна келнә. - Бичкдүдин билг-эрдм делгрүллһнд багшнр ик нилчән күргнә. Тегәд багшин болн сурһмҗлгчин җилд күүкд-көвүд эрдмтә улс болҗ өсхд насн-җирһлән нерәдҗәх улсин күч-көлсинь үнллго бәәҗ болшго. Немр сурһулин бүрдәцст бичкдүдин билгинь делгрүлҗәдг багшнрин ач-тусинь темдглҗәнәвидн. Көгҗмин болн билг-эрдмин сурһуль бичкдүдт оюни сурһмҗ өгч, ке-сәәхн делкәд көтлҗ орулна. Өсхләрн күүкд-көвүдин хаалһнь олнзүсн болв чигн мана сурһульд авсн билг-эрдмин сурһмҗ җирһлднь даңгин туста болхмн. Билгтә багш болн хореограф Ирина Самсонован нернд эн концерт нерәдгдв. «Веселая карусель» ансамбль эн билгтин нериг зүүнә. Олн күүкд-көвүдт билг-эрдмән делгрүхд туслсн эн күүнә нерн тиигәд мартгдҗахш. Кергинь үүрмүднь, сурһульчнрнь цааранднь күцәҗ йовна».
(полную версию статьи можно посмотреть в бумажной версии выпуска № 134 (18973) 12 декабря 2023 года, ВТОРНИК)

ҖИРҺЛИН Кермн

Видео