Зуңква гегәнә көшә

14-12-2023, 09:50 | Общество

Таңһчин Городовиковск районд Зуңква гегәнә көшә авч ирв. Бурхн Багшин номин гелуг халхин үүдәһәч болгч Зуңква гегәнд Хальмгт икәр шүтнә.

Өөдән цолта болн гүн медрлтә шаҗна эн үүлдәчд нерәдҗ, Зулын өдр миңһн зул өрггднә. Төвдин бурхн - шаҗна үүлдврт ик хүврлтс орулгдҗасн кемд Зуңква гегән гелуг нер зүүсн номин халхин эклц тәвсн болдг.
Хальмгуд олн зун җилмүдт гелуг халхиг бәрҗ йовна. Тер учрар хальмгуд Зуңква гегәниг цань уга икәр күндлнә. Бәәрн хурлд эн көшәг хурлын ах багш ген Ямпхелин седвәрәр авч ирсмн. Ода күндтә багшин көшә хурлд Зулын байрин өмн ном умшгдҗ залҗ орулгдв. Бурхнд шүтдг бәәрн әмтн Зуңква гегәнә көшәг зальврҗ тосад, хурлан зөв эргәд мөргәд, залрҗ ирсн күндтә багшт бәрцән бәрв.
Зулын өдрин өмн ик чинртә шаҗна үүлдвр күцәгдснь евәлтә йовдл болҗана. Зулын өдр йириндән Зуңква гегәнд зальврдг, терүнд нерәдҗ миңһн зул өргдг авъяс бәәнә. Эн җил Городовиковск района әмтн хурлдан Зуңква гегәнә көшә залҗ орулҗ авсн ик байрта мөргүлд ирҗ, Зулан давулв.

УШКАНА Сувсн

Видео