Бичкдүдин эмнлһнд һацур белглв

16-12-2023, 11:10 | Общество

Хальмг Таңһчин Улсин Хуралын (Парламентын) депутат, «Шин улс» партин әңгин һардач Фероян Гаджи Манҗин Валентинан нертә таңһчин бичкдүдин медицинск төвд һацур белглв. Өндртән тавн метр һацур ик-бичкн угаг байрлулҗ, өөрдҗ йовх Шин җилин белг болв. Һацуриг хотл балһсна бичкдүдин поликлиникд углҗ тәвв, нааран ирсн күүкд-көвүд терүг эргҗ наадна, өөрнь зурган цокулна.

Шидр депутат эмнлһнә көдләчнрлә харһҗ күүндәд, зака үүдәгч үүлдвриннь тускар ахрар келҗ, эрүл-менд харлһна халхд ямаран закад батлгдсна тускар хувалцв. Тиигәд, сессин көдлмшин өмн бюджетин, экономическ төрин комитетин сүүрт ФОМС-ин региональн әңгин һурвн җилә бюджетин тускар күүндвр болв, гиҗ эн келв. «Таңһчд эрүлменд харлһна көдләчнриг дөңнлһнә, эмнлһнә бүрдәцсин материальн-техническ ул батруллһна төрмүд хаһлгдҗана. ФАП-мудын төлә кергсл хулдҗ авгдҗана, эмнлһс түргн дөң күрглһнә шин көлг-күчәр теткгдҗәнә, 2024 җилд Городовиковск балһснд шин поликлиник секгдхмн, Цаһан Амн поселкин поликлиникд ясвр кегдв, удл уга таңһчин эмнлһнд маммограф углҗ тәвхмн. Цуг эн төрмүдин тускар Хальмг Таңһчин Толһач Хаска Бату шуд залһлдана йовудт келв. Таңһчин әмтн сән чинртә эмнлһ болн дөң авх зөвтә, терүнә төлә аһу ик көдлмш күцәгдҗәнә. Эрүл-менд харлһна халхд кесг нәрн төр бәәнә, болв тедниг хаһлхин төлә таңһчин һардвр болн депутатнр нөкцҗ үүлдҗәнә », - гиҗ Гаджи Фероян келв.
(полную версию статьи можно посмотреть в бумажной версии выпуска № 136 (18975) 16 декабря 2023 года, СУББОТА)

ДООҖАН Наталья
ЗУРГТ: таңһчин Улсин Хуралын депутат Фероян Гаджи таңһчин эмнлһнә көдләчнрлә

Видео