Баатрин зөрмгнь бахмҗ үүдәв

16-12-2023, 11:20 | Общество

Лаганя района Улан Хол селәнә Зая Пандитан нертә дунд сурһульд Төрскнә Баатрмудын сән Өдрт нерәдәд, эн сурһуль төгсәсн Очра Анатолийин нертә ширә секлһнә байрин керг-үүлдвр болв. Анатолий Дмитриевич Афганистанд болсн дәәнд орлцад, залу-зөрмгән үзүләд, Улан Одн орденар, «Залу-зөрмгин төлә» болн «Ханлтта афганск улсас» гидг медальмүдәр ачлгдсмн.

Эн сурһульд Очра Анатолий 1971-1980 җилмүдт сурч йовла. Тер цагас авн олн җил давсн бийнь эн төрскн сурһулян мартлго, нааран ирҗ хамдан сурч йовсн үүрмүдтәһән харһна, эндрк сурһульчнрт цергә үүлдвриннь тускар келҗ өгнә. Сурһулян төгсәснә хөөн Очра Анатолий цергт мордад, түрүләд Краснодарск крайин Ейск балһснд цергә белдврт бәәсмн. Сара хонг болад, Афганистанд йовулх салдсмудын баг бүрдәв. Анатолий эврә сән дурар тер багин ханьд орад, 181-ч тойгта йовһн цергә полкд тусв. 1982 җилин зунар Панджемер уулын өөр цергә керг-үүлдвр эклсмн. Нег бәрлдәнә йовудт Очра Анатолий көлән күндәр шавтасн бийнь үүрмүдән хайлго цааранднь хортнла дәәлдсмн. Тер цергә керг-үүлдврин хөөн энүг «Залу-зөрмгин төлә» гидг медаляр ачлсмн. Җил давад, Суруби селәнә өөр Очра Анатолий эврәннь әңглә хортна бәрәнд туссн взводыг сулдхад, залу-зөрмгән үзүлсмн. Душманмуд зөрмг хальмг салдсин тускар медәд, энүг бәрҗ авсн улст ик мөрә өгхәр зарлсн болдг. Тер бәрлдәнд зөрмгән һарһад, кесг салдсин әм аврсн төләднь энүг Улан Одн орденәр ачлсмн.
(полную версию статьи можно посмотреть в бумажной версии выпуска № 136 (18975) 16 декабря 2023 года, СУББОТА)

ДООҖАН Наталья
ЗУРГТ: Баатрин ширә секлһнд нерәдгдсн хургин кем

Видео