Цергчнр немр сурһуль сурв

16-12-2023, 11:25 | Общество

Хальмг Таңһчин социальн делгрлтин, күч-көлснә болн көдлмшәр тетклһнә министерствин барин цергллтин зәңглсәр, шишлң цергә керг-үүлдврт орлцачнриг дөңнлһнә керг-төр дигтә-даратаһар күцәгдҗәнә. Тиигәд таңһчин әмтиг көдлмшәр тетклһнә цергллтин көдләчнр СВО-д орлцсн 37 күүнд өңгәр немр сурһуль сурхд эрлһән орулхд болн эдниг көдлмшәр тетклһнд дөңгән күргв.

Одахн таңһчин социальн делгрлтин министерствин көдләчнр олна дөңнлтин штабин ул деер «Моя карьера с Единой Россией» гидг төсвин медлд шишлң цергә керг-үүлдврт орлцачнрла болн теднә өрк-бүлмүдлә харһлт бүрдәв. Министерствин әңгин һардач ЦаһанМанҗин Маринан келсәр, мергҗлтнр СВО-д орлцачнрт көдлмш олҗ авхд дарунь дөңгән күргхәр шунна. Немр сурһуль сурч шин эрдм дасх санаһан медүлсн цергчнрт кергтә бәрмт цаас белдхд болн эрлһән орулхд мергҗлтнр дөң болна.
Таңһчин Улсин Хуралын (Парламентин) депутатнр, «Төрскән харсачнр» шаңһа саңгин региональн әңгин, сурһуль-эрдмин бүрдәцсин элчнр болн әмтиг көдлмшәр тетклһнә цергллтин мергҗлтнр харһлтд орлцв. Шишлң цергә керг-үүлдврт орлцачнр болн эднә өрк-бүлмүд соньмсулҗадг төрмүдәр сурвр өгч, тодрха цәәлһвр авв.

БАТАН Сәәхлә

Видео