Владимир Путиниг дөңнҗ

26-12-2023, 12:00 | Общество

Ирх җилд мана орн-нутгт Әрәсән Президентин суңһвр болхмн. Владимир Путин суңһврт орлцхин туск шиидврән олнд медүлв. Шидр Элстд «Негдсн Әрәсә» партин олна дөңнлтин штабд Владимир Путиниг дөңнлһнә региональн штаб секгдв. Терүнә ханьд олна бүрдәцсин, күч-көлсч багмудын, профсоюзин, ОНФ-н, ветеранмудын ниицәсин элчнр орв.

Әрәсән Президентин үүлд Владимир Путиниг суңһх седвәриг дөңнлһнә багин хургт орлцсн «Экспертный центр» ООО-н һардач Максим Сорокинә келсәр, тер керг-үүлдврт мана орн-нутгин нертә номтнр, сойлын үүлдәчнр, олна бүрдәцсин нүүрләчнр, партьсин гешүд орлцв. Цуһар Владимир Владимировичиг нег дууһар дөңнҗ, Әрәсәг өмәрән залх тоомсрта күн болҗана гив.
Региональн штабин гешүд, Т.Хахлынован нертә медицинск колледжин һардач Манҗин Кермн, Б.Б.Городовиковин нертә Хальмг ик сурһулин багш Батыра Владимир, эврә сән дурар үүлддг улсин «Бидн Хамдан» әңгин һардач Шахныка Татьяна региональн штаб секлһнә керг-үүлдврт орлцв.
Шидр мана таңһчд Владимир Путиниг суңһх седвәриг дөңнҗәдг улс һаран тәвлһнә керг-үүлдвр Элст балһсна Диилврин паркд эклв. Таңһчин әмтн Владимир Владимировичиг дөңнҗ, диилвр дурдҗана.

Мана зәңгч

Видео