ЛУ ҖИЛ ОРУТА БОЛТХА!

11-01-2024, 09:05 | Общество

Эңкр мана умшачнр! Һарcн Туула җил цуг маднд кесг соньн тоотарн ончта болв, күн болһна, өрк-бүл болһна җирһлд чигн байрта олн йовдл учрснь лавта. Хуучн җил һарад, Лу җил орчкв, шин җилд мана таңһчин цуг улс хөвтә-кишгтә, эрүл-менд бәәтхә! Цуг мана умшачнрин болн өөрхн элгн-саднаннь җирһлнь байрта-бахмҗта болтха! 2024 җилин түрүн өрәлд “Хальмг үнн” газетд шунмһа кевәр бичгдсн Лаганя, Яшалтан, Целинн, Хар Һазра, Октябрьск, Сарпан, Ик-Буурла райодын толһачнрт, бәәрн улст әрүн седкләсн ик гидг ханлт өргҗәнәвидн! Нарт-делкәд бәәдг хальмг келәр һардг ор һанцхн мана газетиг дөңнҗ бичүлҗ авад, маднд урмд өгәд бәәнәт.

Цугтан эрүл-менд,
Цә-чигән элвг-делвг болтха!
Эн шин җил өлзәтә,
Эң-зах уга цаһан хаалһта болтха!
Үртә-садтаһан, малта-хартаһан
Бәәсн-бәәсн һазртан,
Байн сәкүсн хәәрлҗ,
Ханядн-тома уга бәәҗ,
Үвлин зуд-зурхнас
Үкл-үргән уга бәәҗ,
Сәәхн менд-байрта
Амулң эдлҗ бәәхитн
Деедсин олн бурхдын
Делкән Цаһан Аав евәх болтха!

БЕМБИН Евгений

Видео