Дурни сәәхн частр

11-01-2024, 09:55 | Общество

«Тоһрүна би» хальмг бииһин билг-эрдмин бәәтхә, цуг делкән хореографин зөөр болсн бииһин тускар келхмн. Хальмгин Баатр, сойлын ачта үүлдәч, нертә хореограф болн балетмейстер Петр Надбитов эн сәәхн бииг далдгч җилмүдин дундурар белдҗ тәвсмн.

Петр Тимофеевичин тодлврар, Московск сойлын күрәлңд сурчахдан улсин үүдәлтин Герт дегтрин саңд дууна хураңһус шинҗлҗ хәләҗәһәд, генткн «Тоһрун-шовун» гидг дуунд эн оньган өгв. Генәртә сәәхн айс чееҗд төөнрәд бәәв, үгмүд чигн тер дарунь энүнд тодлгдв. Мингиян Пюрвеев болн Санжара Байдыев тиим сәәхн ду һарһсмн. Эн дууна гейүрлһнә айст биилҗәдг шовун Петр Надбитовин нүднднь үзгдсн болад бәәв. Бәәҗ-бәәҗәһәд тер дүр уханднь орхла, шовун җиврән яһҗ делдгинь биичин һарин дайлһар яһҗ үзүлҗ болхинь, тоһрун шовун нег көлән өргәд, һәрәдәд, эргәд биилҗәхинь яһҗ үзүлҗ болҗана, гиҗ балетмейстер даңгин ухалдг билә. Һурвн җилдән эн тоолвр энүнә седкл-уханас һарлго бәәсмн. Сурһулян төгсәһәд, һурвн җил болад, эн сансан күцәв. Түрүн болҗ бииг Галина болн Валерий Эрдниевихн биилсмн, олн хәләһәчнр болн дамшлтта мергҗлтнр энүг өөдәнәр үнлв. Дөчн һар җилмүдин туршарт сәәхн эн бииг биилҗ кесг артистнр өөдән күцәмҗ бәрсән үзүлҗ йовв.
«Күүнә дурна өвәрц сәәхн частр» – гиҗ эн бииг нер туурсн балетмейстер Игорь Моисеев үнлсмн. Хаврин уняртсн тег, өрүни маңһарт биилҗәдг тоһрун шовуд, мөңк көк теңгр, эң-зах уга наласн һазр – эннь маднд, хальмгудт, даңгин өөрхн болдг хәәртә бәәдл мөн. Нер туурсн улсин зурач Гарри Рокчинскийин, хальмг бииг цуг делкән кемҗәнд өргсн Петр Надбитовин төрскн теегтән нерәдсн частрнь хальмг бииһин билг-эрдмин ончта өөдмиг лавта кевәр үзүлҗәнә.

УШКАНА Сувсн

Видео