Таңһчин әмтн Владимир Путиниг дөңнҗәнә

16-01-2024, 12:05 | Общество

Давсн җилин бар сарин 18-д Владимир Путин РФ-н Төв суңһврин комиссьт Әрәсән Президентин суңһврт орлцхин төлә иткл цаасан орулсн билә. Ода болхла туула сарин чилгч күртл 300 миңһн күн һаран тәвәд, Владимир Владимировичин кандидатуриг дөңнҗәхән медүлх зөвтә.

Бар сарин 23-ас авн мана орн-нутгин регион болһнд, тер тоод Хальмг Таңһчд, Владимир Путинә кандидатуриг дөңнҗәх улс ирҗ һаран тәвлһнә шишлң ормс бүрдәгдсн бәәнә. Элстд олна дөңнлтин штабд болн әмтн олар ирдг һазрт бәәрн улс һаран тәвҗәнә. Райодт бас әмтн эн керг-үүлдврт шунмһаһар орлцҗахиг темдглх кергтә.
Эн сарин эклцәр Владимир Путинә итклтә элч Шахныка Татьяна региональн суңһврин штабин һардач Бадан Бадмла хамдан таңһчин әмтн һаран тәвсн цаасиг Москвад төв суңһврин штабд күргв. «Һаран тәвлһнә керг-үүлдвр Шин җилин өмн өргнд эклсн бийнь таңһчин әмтн амрлһна өдрмүдт шунмһаһар эн дааврта кергт орлцҗ, Владимир Путиниг дөңнҗәхән медүлв. Әмтн һаран тәвсн цаасиг бидн шинҗлҗ хәләснә хөөн Москвад күргвидн. Төв суңһврин штабд тедниг дәкәд нег шинҗлҗ хәләһәд, цугнь дигтә-даратаһар күцәгдсиг темдглв. Мана таңһчд ах үйин улс, баһчуд, шишлң цергә керг-үүлдврт орлцачнр седвәрән медүлҗ, олна нүүрт эн кергт орлцҗ даавран медүлснь байрта. Ода эн керг цааранднь давулгдҗана. Волонтермуд һаран тәвхәр ирсн улсла харһҗ, туула сарин чилгч күртл теднәс цаас орулҗ авхмн. Эн өдрмүдт хол селәдт, райодт болн хотл балһснд шишлң кесг бәәрн секгдв. Владимир Путин мана орн-нутгиг уралан зөрх толһач болҗана гиҗ әмтн ухан-тоолврарн хувалцна», - гиҗ Шахныка Татьяна келнә.

(полную версию статьи можно посмотреть в бумажной версии выпуска № 3 (18985) 16 января 2024 года, ВТОРНИК)

ДООҖАН Наталья
ЗУРГТ: Владимир Путинә дааврта элч Шахныка Татьяна болн олна дөңнлтин штабин һардач Бадан Бадм таңһчин әмтн һаран тәвсн цаас төв суңһврин штабд авч ирв

Видео