Селәнә эдл-ахун делгрлтиг дөңнҗ

20-01-2024, 17:05 | Общество

Мана нег һазра улс Владимир Путиниг дөңнәд, өдр болһн бүрдәгдсн әңгст ирәд, һаран тәвҗәнә. Эн керг-үүлдвр туула сар төгстл болхмн. Тодлхас, бар сарин 23-ас авн орн-нутгт, мана таңһчд бас В.Путиниг дөңнҗәдг улсин төлә һаран тәвлһнә шишлң әңгс Элстд болн райодар бүрдәгдв.

Таңһчин нертә үүлдәчнр, һардачнр, медәтнр, баһчуд чигн тер әңгст олар ирҗ орн-нутгин президентиг дөңнҗәхән медүлҗәнә. Моһа сард болх суңһврт орлцхин төлә Владимир Путинд 300 миңһн күүнә һар тәвсн иткл цаасн кергтә болҗана.
Шидр таңһчин селәнә эдл-ахун делгрлтд тәвцән орулҗадг фермермүд ухан-тоолврарн хувалцв.
Городовиковск района бәәрн күн, КФХ-н һардач Алексей Медведев:
Әрәсән Президент Владимир Путинә күцәҗәдг керг-төрнь нанд йир таасгдҗана. Батлсн зәрлгүднь, һарһсн шиидврмүднь-цугнь мана орн-нутгин цецгәрлтин төлә кеҗәдг көдлмш болҗана, гиҗ тоолҗанав. КФХ-н һардач болсн төләдән селәнә эдл-ахун халхар йилһгдҗәдг дөңгиг цугинь олзлҗанавидн. Мана КФХ буудя болн талдан урһмл урһана. Эн көдлмшт олн зүсн тоот кергтә болна. Шаңһас авсн дөңгәр шишлң көлгн-күч болн талдан селәнә эдл-ахун кергсл хулдҗ авнавидн.
«Шатта» КФХ-н һардач Санл Менкеев:
Хамгин түрүнд мана Президент Владимир Путин ик дамшлтта, гүн медрлтә, дааврта үүлдәч болдгинь темдглх кергтә. Әрәсәд 200 шаху келн-улс хоорндан ахнр-дүүнр мет, ни-негн бәәнә. Өдгә амр биш цагт делкән барун үзгин орн-нутгуд Әрәсәг даҗрҗ, мадна туст олн санкцс һарһад йовна. Тер бийнь мана Әрәсә омган геелго, эврә орн-нутгтан кеҗ һарһсн эд-тавран, эдл-уушан олзлад, цааранднь делгрәд йовна, гиҗ келх кергтә. Нанд өөрхн селәнә эдл-ахун халхар болхла малчнр шаңһас олн дөңнлһнә эв-арһс олзлҗ, тохма мал өсклһнд тәвцән орулҗ йовна. Цуг эн тоот Владимир Путинә чик үүлвдрин нилч гиҗ тоолҗанав. Одахн Элстд бүрдәгдсн шишлң әңгд ирәд, Владимир Владимировичин төлә һаран бас тәвләв.

Белдснь КАРСАНА Евгения

Видео