Тольятти балһснд маши кеҗ һарһҗахинь хәләв

20-01-2024, 17:25 | Общество

Городовиковск балһснд бәәдг Буджала Алдр «Елка желаний» гидг керг-үүлдврт орлцад, көлг кеҗ һарһдг заводт одх санан бәәхин тускар бичсн бичгән йовулсмн. Әрәсән үүлдврин болн хулд-гүүлгәнә министрин дарук Василий Шпак көвүнә бичгиг умшад, энүнә санаһинь күцәв. Тиигәд одахн Алдр эктәһән Тольятти балһснд одад, АвтоВАЗ заводын үүлдврлә таньлдв.

Алдр Башантан колледжин 1-ч курсин оютн болна, эн автомеханикин эрдм дасчана. Көвүн бичкнәсн авн олн зүсн маши цуглулҗ, көлгн-күчәр соньмсна. Эцкнь көвүнәннь тааслт медәд, көлгнә туск кесг дегтр хулдҗ авна. Экнь Татьяна Анатольевнан келсәр, наадһасин лавкд одхларн эцкнь үрндән олн зүсн тамһта машид эрк биш хулдҗ авдг билә, тегәд ода көвүнд дала машин хурагдв.
Әрәсән үүлдврин болн хулд-гүүлгәнә министрин дарук Василий Шпак болн АвтоВАЗин һардвр Татьяна Анатольевнад болн Алдрт заводт өдгә цага эв-арһс олзлгдҗ кеҗ һарһдг «Vesta», «Niva», «Granta» машид үзүлв. Шин көлг шинҗләд хәләснь көвүнд икәр таасгдв. Эн эктәһән заводын музейд одад, тенд бәәдг хуучн машид бас хәләв, «Гонка чемпионов» гидг марһанд орлцв. Энүнәс нань эдн Тольятти балһс һәәхч цаган сергмҗтәһәр давулв. Келхд, энүнә эцк ода шишлң цергә керг-үүлдврт орлцҗана, тегәд көвүнә санань күцснд эн бас байрлв.
- Олн зүсн маши яһҗ кеҗ һарһдгиг үзхәр даңгин сандг биләв, тегәд цугтаднь ик ханлтан өргҗәнәв. Күн болһна җирһлд ончта, илвтә йовдл учрдгиг ода ирҗ медүв, тегәд эрк биш сансн санан күцх гиҗ күн болһн ухалх зөвтә, – гиҗ Алдр келнә.
Волжск автомобильн заводт одсна хөөн Алдр иргчдән энд көдлх шиидвр авв. Ода болхла энүнд сурһулян сәәнәр сурад, эрдмин халхар гүн медрл хоршаҗ авх кергтә.

БАТАН Сәәхлә
ЗУРГТ: Әрәсән үүлдврин болн хулд-гүүлгәнә министр Василий Шпак, Буджала Татьяна болн Алдр (зүн бийәс барун талагшан) АвтоВАЗ-д одсн кем

Видео