Көвүдт – Шин җилин белг

20-01-2024, 17:40 | Общество

Хальмг Таңһчин Улсин Хуралын (Парламентин) депутат Елена Лотник «Елка желаний» гидг буйнч седклин керг-үүлдврт орлцад, Джунгуровихнә өрк-бүлд гиичлҗ одв.

Йистә Дима көвүн футболар соньмсна, тавта Максим дүнь зург зурхдан болн конструкторар наадхдан дурта. Тегәд көвүд Киитн аавд бичг бичәд, наадһас белглхиг сурсмн. Депутат көвүдин сана күцәҗ белг авч ирв. Шин җилин байрла Джунгуровихнә өрк-бүлиг йөрәһәд, депутат хөв-кишг дурдв. Көвүд шин наадһаст байрлҗ күндтә гиичд ханлтан өргв.
Таңһчин Улсин Хуралын депутат Цекрә Зулта Элст балһснд бәәдг долата Батр көвүнд велосипед белглв. Көвүн олн үртә өрк-бүлд өсчәнә, тегәд эк-эцкднь иим үнтә белг хулдҗ авх арһ уга бәәсмн. Батрин ахнь елкажеланий.рф гидг сайтд бичг бичәд, дүнь велосипедин тускар кесгәс нааран ухалҗана гиҗ эрлһндән заав.
Батр биилхдән, конструкторар наадхдан дурта, үүрмүдтәһән самокатар гүүлгҗ амрна, одахн эн боксар соньмсад, ахтаһан хамдан секцд орд болв. Батрин бичгиг депутат Цекрә Зулта шүүҗ авв, тегәд эн көвүнд өдгә цага сән велосипед белглв.

БАТАН Сәәхлә
ЗУРГТ: депутат Елена Лотник Джунгуровихнә өрк-бүлиг йөрәҗәх кем

Видео