ВДНХ-д Хальмгин дизайнерин кегдлмүд

20-01-2024, 17:55 | Общество

Әрәсән ВДНХ-д көдлҗәдг «Әрәсә» гидг нарт-делкән һәәхүл форумин кемҗәнд Хальмгин дизайнерин кегдлмүд үзүлгдҗәнә. SHCHUR гидг бренд терүгинь олна оньгт тусхаҗана. Цугәрәсән универмагин бәәдлтәһәр бүрдәгдсн яарм 75-ч павильонд болҗана. Регионмудын хамгин сән гисн болн олна тааслт олсн кегдлмүд энд үзсн деерән хулдҗ авч болхмн. Келхәс, SHCHUR бренд 7 җил үүлдҗәнә. Терүнәс 4 җилин туршарт Хальмгт эн көдлмшән делгрүлҗәнә.

Өдгә цагт компань өлгмр кегдлмүд кеҗ һарһхар белдвр кеҗәнә. Цагин некврт ирлцәтә сәәхн өлгмр хувц белдҗ һарһхар эдн шунҗана. «SHCHUR - гисн энтн сән чинртәһәр күцәгдсн өвәрц кегдл болҗана. Сән чинртә өлгмр хувциг хәәһәд, шинҗллт кегдснә ашт эн ода олна оньгт тусхагдҗ бренд болсмн. Өмсхд эвтә, чинрән удан геедго, хәләхд сәәхн хувцн әмтнә оньгиг ода авлна. Эднә кесн хувцн цагин кемҗәнд ирлцәтә болсн деерән өмссн күүнд эвтә болн зокаста болҗ, хәләхд нүд авлм болдгар кехәр хәәврән зогсаҗахш. Ямаран чигн цагт, ямаран чигн неквртә күүнд ирлцәтә хувц келһн - мана күцл, - гиҗ SHCHUR брендиг бүрдәсн Елена Хасикова цәәлһвр өгнә. Иим форумд орлцлһн - SHCHUR брендин өвәрц тоотыг олн улст үзүлҗ медүлх таал өгчәнә. Хальмгт үүдәгч үүлдвр олн зүсн халхар делгрлт авчахинь медүлҗәнә.

ҖИРҺЛИН Кермн

Видео