Үйнриг залһҗадг үүдәврмүд

20-01-2024, 18:05 | Общество

Никита Амолданович Санджиевин нерн Хальмг Таңһчин әмтнд темдгтә нерн мөн. Энүнә үүдәврмүдиг меддго күн уга болх. Мөрн деерәсн таңһчин хотл балһсан харвҗадг нер туурсн Ока Городовиковин дүр күн болһна оньг авлна. Баатрмудын Аллейд цутхгдсн дүрмүд нааран ирсн гиичнрт өврмҗтә болна. Хад чолунд билгтә бәрмлчин (скульпторин) һарар тодлгдсн зөргтә хальмгудын дүрмүдин негнь хальмг улсин бичәч, «Хальмг үнн» газетд олн җил көдлҗ йовсн Инҗин Лиҗин дүр болҗахнь редакцин көдләчнрт йир хәәртә.

Хальмгин хотл балһснд, райодар болн селәдәр эн билгтин һарар кевлгдсн олн бумблвс бәәнә. Таңһчин түрүн мергҗлтә бәрмлч Никита Санджиев төрскн һазр-усндан, олн-әмтндән нерәдсн олн үүдәврмүднь эн җил маднд нег үлү ик өөрхн болҗ медгднә. 2024 җилин туула сарин 10-д Никита Амолданович 100 нас наслх бәәсмн. Н. Пальмовин нертә Келн-улсин музей ончта эн өөнд нерәдҗ соньн кесг төсв болн чинртә керг-үүлдврмүд кехәр зуралҗана. Мөрн сарин эклцәр РСФСРин улсин зурач Никита Санджиевин бәәдл-җирһлд нерәдсн керг-үүлдврмүд бүрдәгдхмн. Эврә эрдм делгрүллһнд Никита Амолданович Санджиев орулсн тәвцин тускар номин-дамшлтын хургт ик күүндвр болхмн. Нертә бәрмлчин үүдәврмүдин һәәхүлд олн улс ирҗ, билгтә зурачин үүдәврмүдлә шинәс таньлдҗ, билгинь, ачинь үнлх таал учрҗана. Бәрмлчин 100 җилин өөнд нерәдәд җилин туршарт сурһулин заведеньсәр харһлтс, һәәхүлмүд болн нань чигн керг-үүлдврмүд күцәгдхмн. Тер тоод урн һарта бичкдүд болн баһчуд дунд үүдәгч хәләврмарһан зарлгдҗана.
(полную версию статьи можно посмотреть в бумажной версии выпуска № 5 (18987) 20 января 2024 года, СУББОТА)

ХӨӨЧИН Галина

Видео