Бурхна номин улыг дасхар

20-01-2024, 18:15 | Общество

Бурхн Багшин Алтн сүмд өсч йовх үйнриг шаҗна номла таньлдулх сурһуль секгдв. Бурхн Багшин номин ул-сүүрлә сурһульчнриг болн баһчудыг дасхх төр тәвгдв. Нарн өдр болһн сурһулин кичәлмүд болхмн.

Әрәсән сурһуль-эрдмин министр Сергей Кравцов таңһчд йосна гиичллһнд ирсн кемд эн төрәр күүндвр кегдсмн. Ода хальмг улсин оюни болн шагшавдын җирһлд зөвтә орман олх сурһуль үүлдврән эклв. Хальмгин Шаҗн Лам Тендзин Чойдак түрүн харһлтыг сурһульчнрла күүндҗ давулв. «Бурхн Багшин номла таньлдсн цагтан баһчуд уха туңһаҗ, олн зүсн йовдлмудын учринь хәәҗ, медҗ авхар зүткх - гиҗ Хальмгин Шаҗн Лам тоолҗана. - Җирһлд ямаран чигн йовдл учрв чигн үүмлго, цаг зуур болвчн уха туңһаҗ, яһад тиим болсинь тоолад хәләхлә, чик шиидвр авч болхмн. Юуна чигн учр-утхинь медҗ авч үүлддг медрл авхларн, баһчуд җирһлин хаалһан чикәр залҗ чадхмн».
Келхәс, урднь хурлмудт шаҗна номин эклц медрл өгдг иим сурһуль үүлдҗәсмн. Эн сурһуль туула сарин 14-д эклв. Таңһчин сурһуль-эрдмин министр Әңгрә Булган, эн министерствин әңгин һардач Увшин Зоя сурһулин түрүн кичәлд орлцв. Энд 6-8 классмудын сурһульчнр медрл авхмн. Кичгә Төлән нертә келн-улсин гимназин ул деер тер сурһуль давхмн. Бурхн Багшин номин туск төрәр Төв хурлын гелңгүд цәәлһвр өгчәхмн. Терүнәс нань шаҗна эн сурһульд тод бичг дасхмн, күүкд-көвүд дөрвн җилдән сурх гиҗ зуралгдҗана.

УШКАНА Сувсн

Видео