Эңкр болн дурта улс цуглрв

23-01-2024, 13:40 | Общество

Москва балһснд ВДНХ-д «Әрәсә» гидг һәәхүлд өрк-бүлин Җилд нерәдҗ «Эңкр -дурта» гидг керг-үүлдвр эклв. Эн ик хург туула сарин 19-д экләд, маңһдур төгсхмн. Терүнд мана орн-нутгин делгрлтд тәвцән орулсн өрк-бүлмүд, ут тоодан миңһн һар күн орлцҗана. Мана таңһчас терүнд Аршан поселкд бәәдг зурһан үртә Чимидовихнә өрк-бүл орлцҗ, төрскн һазр-уснаннь тускар олнд келҗ, хальмг улсин сойлла, авъясла таньлдулҗ, билг-эрдмән үзүлв.

Ирина болн Александр Чимидовихн тавн күүктә болн нег көвүтә эк-эцк болна. Эдн 2016 җилд Цугәрәсән өрк-бүлмүдин таңһчин марһанд орлцад, «Селән һазрт бәәдг өрк-бүл» гидг номинацд диилвр бәрсмн. Герин эзн Александр олн җилдән түргн дөң күрглһнә станцд җолач болҗ көдлҗәнә, Ирина болхла балһсна 15-ч тойгта дунд сурһульд багшлна. Күүкднь сурһулян сәәнәр сурч, олна бәәдл-җирһлд шунмһаһар орлцна, билг-эрдмәрн ончрна. Александр болн Ирина хөрн һар җилдән ниитә бәәҗ, күүкдтән чик сурһмҗ өгч, өвкнриннь авъяс-заңшал хадһлҗ йовна. Әрәсән кесг булңгас ирсн билгтә, өнр-өсклң өрк-бүлмүдлә хамдан иим ик хургт орлцснь байрта йовдл болв.
(полную версию статьи можно посмотреть в бумажной версии выпуска № 6 (18988) 23 января 2024 года, ВТОРНИК)

ДАВАН Наталья
ЗУРГТ: өнр-өсклң Чимидовихнә өрк-бүл «Әрәсә» гидг һәәхүлд

Видео