Дуулсн дунь седкл авлна

25-01-2024, 13:35 | Общество

Эндр цуг Әрәсәд Татьянан өдр гидг байр темдглнә. Эн өдрлә алдр Пушкинә поэмд дуулгдҗ мөңкрсн Татьяна гидг сәәхн нертә олн күүкд улсиг әмтн йөрәнә. Әрәсәд, мана Хальмг Таңһчд кедү олн Татьяна бәәнә! Медрлин болн эрдмин олн халхар эдн көдлҗ йовна. Килмҗтә ээҗнр, энкр экнр, итклтә иньгүд, дурта экчнр болн дүүнр болҗах эн олн күүкд улсиг йөрәхләрн бидн эндр дууч Татьяна Чиктееван тускар бичҗәнәвидн.

Давсн җил Татьяна Чиктееван җирһлд ик байрта йовдлар темдгтә болв. Татьяна Намджиловна Әрәсән Федерацин ачта артисткин нер зүүв. «Бамб цецг» ансамблин байрин концертд билгтә дуучд күндтә ачлвринь бәрүлҗ өгсмн. Хальмг Таңһчин Залврин ахлач Гиляна Босхомджиева нертә дуучд өөдән ачлвринь бәрүлҗ өгчәһәд, Татьяна Чиктеева дуулсн дуудыг Хальмгт бәәтхә цуг Әрәсәд әмтн сән меддгинь темдгләд, дуучин билг-эрдм иим тааслт олснь таңһчд дууна эрдм өөдән кемҗәнд йовхинь үзүлҗәнә гиҗ темдглв. Татьяна Намджиловнан билг-эрдмин хаалһнь «Бамб цецг» ансамбльла бат залһлдата. Дууна болн бииһин ансамбльд Татьяна 45 җил хооран эклҗ көдлсмн. Үүдәгч үүлдврин бүкл җирһл нер туурсн коллективин ханьд давв. Әрәсән болн һазадын орна кесг хаалһсар йовҗ, олн келн улсин тәәз деер билгән үзүлх кем учрсмн. Альднь болвчн Татьяна хальмг дууна өвәрц сәәхниг үзүлхәр шунҗ йовна. Эвтәкн сәәхн цогцта, хо чирәтә эн дууч тәәз деер һарч ирхлә, әмтнә седклд байр урһсн болдмн. Дууна айсиг өргәд, седклин тааслт олдг җөөлн айлһар дүүргәд, дууч әмтнә оньг авлҗ йовна. Дууна учрнь медгдсн деерән айсин сәәхнд әмтн авлгдна. Тедү дүңгә өвәрцәр, эвлүн сәәхн дольганд әмтнә ухаг залҗ йовх метәр Татьяна дуулна. Энүнә дууна өвәрцнь үнндән седкл авлна.
(полную версию статьи можно посмотреть в бумажной версии выпуска № 7 (18989) 25 января 2024 года, ЧЕТВЕРГ)

ХӨӨЧИН Галина

Видео