Района әмтнлә харһв

30-01-2024, 13:40 | Общество

Шидр Хальмг Таңһчин Улсин Хуралын (Парламентин) Ахлачин дарук, КПРФ партин КРО-н депутатнрин әңгин һардач Нуура Николай болн депутат Эрнҗәнә Петр Лагань балһснд одв.

Хамгин түрүнд депутатнр Лаганя РМО-н толһач Коган Юрийла харһад, района социальн-экономическ делгрлтин төрәр күүндв. Районд келн-улсин төсвсин медлд күцәгдҗәдг керг-үүлдврмүдин, олна мал үвлзллһнә, гер-бүүрин коммунальн эдл-ахун халхд тогтсн бәәдлин туск төр хаһлв. Хөөннь Лаганя района төв дегтрин саңгин умшллһна залд бәәрн улсла харһлт болв.
Таңһчин Хуралын вице-спикер харһлтд орлцачнрт зака үүдәгч үүлдврин тускар келҗ өгәд, бәәрн улсиг соньмсулҗадг төрмүдәр хәрү өгв. Лаганяхн балһснд сән кец-таал тогталһна көтлврин халхар тосхгдсн шин объектсин, усна сурвлҗна систем шинрүллһнә туст күцәгдх көдлмшин, эрүл-менд харлһна төрмүдин тускар тоолврарн хувалцв. Әмтн босхсн төрмүдиг дигтә-даратаһар хаһлхин төлә Нуура Николай зөвин халхар цәәлһвр өгч, сүв-селвгәрн хувалцв.
Тер өдрин бийднь Нуура Николай Лаганьд бәәдг Әрәсән күч-көлснә ветеран Полина Николаеваг 100 җилин өөнләнь йөрәв. Полина Анджаевна Әәдрх-Кизляр хоорндк төмр хаалһ тосхлһна көдлмшт орлцсмн, «1941-1945 җилмүдт Төрскән харсгч Алдр дәәнд туурмҗта күч-көлснә төлә» болн «Олн үртә эк» I болн II девсңгин медальмудәр ачлгдсмн. Николай Эрднеевич медәтлә күүндәд, бәәдл-җирһләрнь соньмсв.

ДООҖАН Наталья
ЗУРГТ: таңһчин Улсин Хуралын Ахлачин дарук Нуура Николай Лаганя улсла харһсн кем

Видео