Гевш Йонтен: «Бурхн Багшин ном олн улсиг негдүлҗәнә»

01-02-2024, 13:55 | Общество

Әрәсән буддистнрин оюни Төв заллтын һардачд хальмг лам гевш Йонтен батлгдв. Бурхн Багшин Алтн сүмин һардвриг толһалҗ, гевш Йонтен кесг җил көдлсмн. Шаҗна ном тархаһад, олн дунд шаҗна болн оюни үүлдвр күцәһәд, шин олн төсвиг һардад, Гевш Йонтен әмтн дунд тоомсрта болв. Әрәсән Олна палатд эн хойрдад суңһгдв.

Күндтә эн үүлд суңһгдсн йовдлын тускар гевш Йонтен иигҗ келв: «Мана орн-нутгт ода олн әмтн хоорндк ниицлтиг батллһар, улс хоорндк хәрлцәнд эвин болн ниицңгү седклин бәәдл оруллһар, олн шаҗн хоорндк хамцлтыг батруллһар ик көдлмш кегдҗәнә. Тер тоод Бурхн Багшин номиг делгрүлҗ, улсин җирһлд терүг оруллһнд чигн килмҗ өггдҗәнә. 2022 җилд Әрәсән Президентин даалһврар «Бурхн Багшин номин сурһульд болн шинҗллтд дөң болх Саң» бүрдәгдсн билә. Бурятьд давсн җил нарт-делкән бурхн-шаҗна хург кегдсмн. 2025 җилд нарт-делкән сүзгтнрин чуулһн Хальмг таңһчд болхмн. Әрәсән сүзгтнрин оюни төв заллтын нерн деерәс Бурхн Багшин номд шүтдг улсин негдлтиг батллһнд, шаҗна күмни сә хәәгч үүлдвриг цааранднь делгрүлҗ, өсч йовх үйнрт шаҗна болн оюни чик сурһмҗ өглһнә, өр-өвч седклин болн эвин бәәдлд тедниг дасхлһна кергт бурхн-шаҗнд шүтдг цуг улсиг негдүлҗ, һазадын олн орн-нутгудт бәәдг олн ниицәслә залһлда бәрҗ үүлдхән медүлҗәнәв».
Гевш Йонтена шунмһа үүлдврин герчнь болгч дәкн нег йовдл тодлулхмн. Давсн җилин чилгчәр гевш Йонтен Москвад болсн төгрг ширән сүүрт орлцла. Бурхн Багшин номд шүтдг Москвад бәәдг үүлдәчнр тер сүүриг бүрдәсмн. Әрәсән хотл балһсна 40 бүрдәцсин элчнр сүүрин көдлмшт орлцв. Санкт-Петербургин, тер мет Әрәсән шар шаҗна нань чигн регионмудын элчнр бас эн сүүрт ирлә. Һазадын орна гиичнриг чигн энд үзҗ болхмн билә.
(полную версию статьи можно посмотреть в бумажной версии выпуска № 10 (18992) 1 февраля 2024 года, ЧЕТВЕРГ)

ХӨӨЧИН Галина

Видео