Басан Городовиковд нерәдәд

06-02-2024, 15:10 | Общество

Шидр Элстд Хальмг Таңһчин хәәртә үрн, нертә үүлдәч, Советин Союзин Баатр Басан Городовиковд нерәдсн «Эпоха Городовикова» нертә дегтрин презентац болв. Дегтрин түүрвәчнрнь таңһчин нертә седкүлчнр Владимир Боваев болн Мөңкә Конеев мөн. Әрәсән Президентин Саңгин дөңгәр эн дегтр барас һарв. Райодын толһачнр, Олна палатын, Элстин бүрдәцсин элчнр, сойлын көдләчнр болн баһчудын җисәнә элчнр эн керг-үүлдврт орлцв.

Хальмг Таңһчин күндтә иргн, дамшлтта седкүлч Владимир Боваевин келсәр, эн төсв таңһчин ачта улсин Хүүвин седвәрәр күцәгдв.
– Хөрн нәәмн настадан района газетин һардачд батлгдсн цагтан Басан Бадьминовичлә харһсн биләв. Тер цагт таңһчин босхмҗд тәвцән орулсн улсин, тодлврмуд дегтртән орулвидн, – гиҗ Владимир Эрдниевич темдглв.
– Эндр мана таңһчд Басан Городовиковиг меддго күн уга, дегтрин презентацд баһчуд олар ирсн сән йовдл, мел эдн иргчдән төрскн һазран цааранднь делгрүлх, тегәд нертә үүлдәчин үлгүрәр көдлҗ йовхмн гисн итклтә бәәнәв, – гиҗ таңһчин сойлын ачта көдләч Иван Басангов келв.
– Хамгин түрүнд тиим чинртә, соньн дегтр барас һарһлһнд туслсн улст ханлтан өргҗәнәв. Басан Бадьминович таңһчиг һардҗ йовсн цагт терүнлә хамдан көдлҗ йовлав. Түрүн болҗ Б.Городовиковиг 1964 җилд нег хургт дәәнә цагин хувцтаһинь 4зсн биләв. Тер цагас авн эн йоста залун, чадмг һардачин дүриг зүркндән хадһлҗ йовнав, – гиҗ Хальмг Таңһчин күндтә иргн Батыр Михайлов тодлврарн хувалцв.
Дегтр һарһлһнд «Калмыкия» таңһчин барин агентствин көдләчнр тусан бас күргсмн. Дегтрт Басан Городовиковин һардврт көдлсн тәвн һар күүнә тодлврмуд орв.
Презентацин йовудт шин дегтрмүдиг район болһна элчнрт, Элстин болн баһчудын бүрдәцст белглв. Эн дегтр селән болһна дегтрин саңд чинртә орман олх зөвтә, гиҗ харһлтд орлцачнр темдглв.

ОЛЬДАН Цаһан

Видео