Шин закадын тускар цәәлһв

10-02-2024, 13:30 | Общество

Хальмг Таңһчин Улсин Хуралын (Парламентин) Ахлачин дарук, КПРФ партин әңгин һардач Нуура Николай одахн Городовиковск районд көдлмшин кергәр одв. Хамгин түрүнд вице-спикер Городовиковск РМО-н толһач Абушина Валерийла харһад, района социальн-экономическ делгрлтин төрәр күүндв. Района толһач муниципальн бүрдәцд күцәгдҗәдг керг-үүлдврмүдин тускар ахрар зәңгләд, эн җил келн-улсин төсвсин медлд ямаран көдлмш кегдҗәхин тускар келв.

Дарунь Нуура Николай района бәәдл-җирһлд шунмһаһар орлцдг, седвәртә улсла, олна ниицәсин гешүдлә болн партин әңгин элчнрлә харһв. Харһлтын йовудт эн зака үүдәгч үүлдвриннь тускар хувалцад, әмтиг соньмсулҗадг сурврмудт хәрү өгв. Тиигәд, дәәнә цагт төрҗ һарсн бичкдүдин зөв харслһна, 110-ч Хальмг мөрн цергә онц дивизин санлын Өдрин туск закад батлгдсна тускар депутат келҗ өгв. Хальмг Таңһчин Улсин Хуралын Ахлачин даалһврар депутатнр селәнә эдл-ахун медлд бәәдг һазрин чинр ясруллһна закана төсв белдҗәхин тускар Николай Эрднеевич бас хувалцв. Харһлтд орлцачнр шишлң цергә керг-үүлдврин, эрүл-менд харлһна көдләчнриг белдлһнә, сән чинртә уудг усар тетклһнә төрмүд босхв. Күүндврин йовудт темдглгдсн зәрм төрмүдәр таңһчин Улсин Хуралын Ахлачин дарук цәәлһвр өгч, тедниг хаһлхин төлә зөв-йосна халхар күцәхиг дурдв. Таңһчин делгрлтин төлә әмтн күчән болн арһ-чидлән негдүлҗ, хамцу үүлдх зөвтә, тегәд олна бәәдл-җирһлд шунмһаһар орлцҗ, эркн чинртә төрмүдәр ухан-тоолврарн хувалцх кергтә гиҗ Нуура Николай темдглв.
Тер өдрин бийднь Нуура Николай Ольга Гайдамакд болн Евгения Галацд КПРФ-ин гешүдин иткл цаас, туула сард 90 җилин өөнән темдглсн партин ветеран Михаил Веселкинд белг бәрүлҗ өгв. Тер мет Николай Эрднеевич медәт Полина Халенгиноваг золһҗ гиичд одв.
Городовиковск балһснд шин поликлиник тосхгдҗана, тегәд вице-спикер тер объектиг бүрткҗ хәләв. Эмнлһнә бәәрн «Хальмг Таңһчин эрүл-менд харлһна түрүн дөң күрглһнә халх шинрүллһн» гидг региональн көтлврин медлд тосхгдҗана. Шин поликлиник эдлврт орулгдсна ашт районд бәәдг 15 миңһн күн сән таалд чинртә эмнлһ авч чадхмн. Поликлиник эн җил секгдхмн гиҗ зуралгдҗана.

БАТАН Сәәхлә
ЗУРГТ: вице-спикер Нуура Николай медәт Полина Халенгиновад гиичлҗ одсн кем

Видео