Седвәртә күүкд улсиг ачлв

15-02-2024, 12:20 | Общество

Одахн «Ниицлт. Диилвр. Иргч» гидг Цугәрәсән II хург болв. Терүг Әрәсән Орн-нутгин Хүүвин депутат, «Негдсн Әрәсә» партин «Күүкд улсин җисәнә» төсвин йосна зүүцүләч Наталья Полуянова секв. Ик хургт күүкд улсин седвәрин, орн-нутгин олна бәәдл-җирһлд, буйнч седклин кергүүлдврмүдт орлцлһна, эрүл-мендин болн нань чигн төрмүд хәләгдв. Тер мет күүкд улсин клубмудын үүлдврин тускар күүндвр болв, партин төсвин региональн зүүцүләчнр дамшлтарн хувалцв.

«Күүкд улсин төр» гидг талвңд Аюша Гилән зака үүдәгч үүлдврин региональн дамшлтарн хувалцҗ, таңһчин Улсин Хуралын депутатнрин суңһврт яһҗ орлцсна тускар келҗ өгв. Бурһун Инна болхла социальн-олна үүлдврин төрәр болсн «Гуманитарная миссия» гидг күүндврт орлцв. Харһлтд орлцачнр Шишлң цергә керг-үүлдврт орлцачнрт болн теднә өрк-бүлмүдт дөң күрглһнә туст хоршагдсн дамшлтарн эдн бас хувалцв.
- Хургт олн зүсн чинртә төрмүд босхгдв, тер тоод зака үүдәгч седвәр татлһиг дөңнлһнә «Күүкд күүнә дун» болн селән һазрт эврә керг делгрүллһнә «Эк селәнд» гидг төсвсин керг-үүлдврмүдин тускар күүндвр болв. Эннь күүкд улс седвәртәһәр болн шунмһаһар үүлдхд, олна бәәдл-җирһлд тәвцән орулхд туслна, – гиҗ «Күүкд улсин җисән» партин төсвин региональн зүүцүләч Аюша Гилән келв.
Хургин чилгчәр күүкд улсин җисәнә үүлдврт шунмһаһар орлцҗ ик тәвцән орулҗадг элчнр партин ачлврмудар темдглгдв. Көтчнрә района депутатнрин Хургин депутат Бурһун Инна «Негдсн Әрәсә» партин Ахлач Дмитрий Медведевин, Хальмг Таңһчин Улсин Хуралын (Парламентин) депутат Аюша Гилән партин генеральн сегләтр Андрей Турчакин Ханлтын бичгүдәр ачлгдв.

ДООҖАН Наталья
ЗУРГТ: Хальмг Таңһчин Улсин Хуралын (Парламентин) депутат Аюша Гилән болн Көтчнрә района депутатнрин Хургин депутат Бурһун Инна

Видео