Хальмг нутган дуундан орулсн дууч

15-02-2024, 13:00 | Общество

Лу сарин нег шинд улсин дууч Борис Очкаев 70 җилә өөнән темдглх бәәсмн. Эңкр хальмг тег үвлин киитнәс серҗ, хаврин кемд орҗах сәәхн цагла, Цаһан сарин байр темдглҗәх өдрмүдлә билгтә дуучиг дуунд дурта олн улс тодлҗана.

Давсн зун җилин йирдгч җилмүдәс авн Борис Очкаевин дуулсн дуд угаһар олн әмтнә нәр-наадн давдго бәәсмн.
Хальмг улсин хуучн болн өдгә цага зун шаху дун Борис Дорджиевичин репертуар тогтасмн. «Цаһан Сар», «Худнр», «Һарсн өдр» болн нань чигн дуд түргн кевәр олн дунд тарв. Борис Очкаев бийнь чигн ду һарһдг бәәсмн. «Келсн күүкн», «Зүркнә дурн», «Хальмг зул», «Хальмг нутга дун», гиһәд эн дуд олн дунд тааслт олв. Көгҗминь нәәрүлҗ бичлһнд Борис Дорджиевичд композитор Аркадий Манджиев, көгҗмчнр Александр Бадма-Горяев, Владимир Цебеков дөң болҗасмн.
Көгҗмин халхар эклц медрл эс авсндан нертә дууч даңгин һундрхдг билә. Тиигхд селән һазрт бичкдүдин көгҗмин сурһуль гиҗ уга бәәсмн. Ээҗнь герин көдлмш кен йовҗ, хальмг дуд дуулдг бәәсмн, теднәс кесгнь көвүнә чееҗд тодлгдв. Эк-эцкнь чигн дуулхдан дурта бәәсмн. Тиигәд тедниг соңсад, дахад дуулад йовҗ көвүн хальмг дуунд йосндан дуран өгсмн. Дунд сурһулян төгсәһәд, Борис эцкдән дөң болхар шиидәд, җолачин эрдм дасв. Наснь ирәд цергт мордв. Дууна билгнь улм делгрәд бәәв. Цергт дуунд дурта көвүн марһанд орлцад, 1973 җилд салдснрин дууна Цугсоюзн марһана лауреат болсмн. Түрүн ачлвран цергт церглҗәһәд Борис Очкаев авсн болҗана. Цергәс бууҗ ирәд, Борис эврә өрк-бүлән өндәлһв. Түрүн үрн күүкн төрв. Тер цагт баһчудыг мал өсклһнд орҗ көдлтн гиҗ дуудвр кедг бәәсмн. Комсомолын дуудврар Борис авальтаһан Лаганяс «Красинский» совхозин фермд ирҗ көдлв. Дегтрин саңд көдлҗәсн авальнь Валентина Николаевна үкр саадг болв. Борис болхла үкр хәләһәд, фермин нань чигн көдлмшиг кеҗ йовв. Үснә-товарн фермд эдн тиигәд күүкнь сурһульд орх кем күртл көдлв.
(полную версию статьи можно посмотреть в бумажной версии выпуска № 15 (18997) 15 февраля 2024 года, ЧЕТВЕРГ)

ХӨӨЧИН Галина

Видео