Өрк-бүлмүдин теткврт һол оньг өггдх

17-02-2024, 17:25 | Общество

Одахн Хальмг Таңһчин залврин сүүр болв, терүнд һурвн төр хәләгдв. Эннь өрк-бүлин Җилд нерәдгдсн кергүүлдврмүд күцәлһн, хаврин тәрә тәрлһнә кемд белдвр келһн болн «Әәмшг уга болн сән чинртә хаалһс» гидг келнулсин төсвин медлд хаалһс яслһна төрмүд болв. Сүүрт Хальмг Таңһчин залврин Ахлач Босхмҗин Гилән, Хальмг Таңһчин Улсин Хуралын (Парламентин) Ахлач Артем Михайлов, ЮФО-д Әрәсән Президентин зөвтә элчллтин федеральн инспектор Александр Беляев, таңһчин прокурор Виталий Семенченко, райодын муниципальн бүрдәцсин толһачнр орлцв.

Әрәсән Президент Владимир Путинә зәрлгәс иштә мана орн-нутгт өрк-бүлин Җил зарлгдсн бәәнә, тегәд терүнә медлд кех-күцәх көдлмшин зура батллһна, өрк-бүлмүдин чинр өөдлүллһнә, нилхд төрлһиг урмдуллһна төрмүдт ик оньг өггдхмн гиҗ таңһчин залврин Ахлач темдглв. «2023 җилд саата күүкд улсиг болн нилхдиг дөңнлһнә керг-үүлдврмүдт ут тоодан 5,8 җува арслң йилһгдв. Мана таңһчд 52 миңһн өрк-бүл бәәнә, теднд 63 миңһн күүкн-көвүн асргдҗана. Бичкдүдтә өрк-бүлмүдин социальн теткврин төрмүдт мана таңһчд ик оньг өггднә, эн җил болхла тиим керг-үүлдврмүдин то немгдх зөвтә. Хальмг Таңһчин Толһач таңһчин Улсин Хуралд өрк-бүлмүдиг дөңнлһнә туск закана төсв орулх даалһвр өгв. Өрк-бүлин чинр өөдлүлх, олн үртә өрк-бүлмүдиг дөңнх немр керг-үүлдврмүд эрк биш батлгдх. Өрк-бүлин төрин зура 2030 җил күртл белдхвидн», – гиҗ Гилән Герасимовна келв.
(полную версию статьи можно посмотреть в бумажной версии выпуска № 16 (18998) 17 февраля 2024 года, СУББОТА)

Барт белдснь ДООҖАН Наталья

Видео