Төрскн һазрин, тууҗин, оюни зөөрин темдг болсн зург

17-02-2024, 17:55 | Общество

Н. Пальмовин нертә Келн-улсин музейд ончта йовдл болв. Хальмг улсин нертә зурач Гарри Рокчинскийин «Мать - земля родная» гидг зургинь шинрүлснә дару төрскн һазртан ирв.

Келхәс, цугтад темдгтә эн зург Рокчинскийин үүлдврт онц орм эзлҗәнә. Түрүн болҗ зург олн хәләһәчнрин оньгт 1964 җилд үзүлгдсмн. Төрскн һазр-усндан цань уга дурта, өсч-боссн теегләрн оюни бат залһлда бәрҗәх седкл, медүлҗәх зург тер дарунь әмтнә тааслт олсмн.
Куйбышев балһснд 1964 җилд болсн «Ик Иҗл» («Большая Волга») гидг түрүн зональн һәәхүлд цуг улсин оньгиг авлсн болдг. Билг-эрдмин мергҗлтнр хальмг зурачин үүдәвриг цуг халхаснь үнлҗ, таасч бичсмн. Һәәхүлд ирсн әмтн болхла, төрскн һазр-усан магтҗах зургин күчнд авлгдҗ, үүдәврин өөр кесгтән уха туңһаҗ зогссмн.
Гарри Рокчинскийин эн ик чинртә үүдәвр Ростов-на-Дону балһсна «Дон» гидг нертә ясврин цутхлңд шинрүлгдсмн. 2023 җилин октябрь сарас авн 2024 лу сар күртл эн ик зург - кемҗәһәрн 160х120 см, тер цутхлңд шинрүлгдҗ, невчк эвдрсн тоотнь ясгдсмн. Зургиг цуг халхаснь шинҗләд, ямаран кевәр терүг ясхинь йилһҗ авад, зурач-реставратор Василий Ефремов күцәсмн. Хальмгин дүрслгч искусствд ик чинр зүүдг үүдәвриг тиигҗ сән чинртәһәр шинрүлсн йовдл үнтә эн зургиг хөөтк олн үйнрт зөөр гиҗ хадһлҗ үлдәх таал учрав. Лу сарин 7-д Гарри Рокчинскийин зург ясгдҗ шинрүлгдснә хөөн Н. Пальмовин нертә Келн-улсин музейд үзүлгдв. Олн улс ирҗ, Хальмгин нертә зурачин үүдәвриг хәләҗ, ухан-тоолврарн хувалцв.
(полную версию статьи можно посмотреть в бумажной версии выпуска № 16 (18998) 17 февраля 2024 года, СУББОТА)

ХӨӨЧИН Галина

Видео