Цергчнрин ач-тусинь темдглв

20-02-2024, 13:20 | Общество

Хальмг Таңһчин Улсин Хуралын (Парламентин) депутат Болдра Валерий Хар Һазра района Адг селәнә сойлын Герт болсн харһлтд орлцв. Советск цергиг Афганистанас һарһсна 35 җилин өөнд нерәдгдсн «төгрг ширән» сүүрт цергә даалһвран үнн кевәр күцәсн нег һазра улсин ач-тусинь темдглв.

Яшкуль селәнд бәәдг Лиҗин Юрий, Хоҗһра Борисин күүкднь болн ачнр-зеенрнь, Дагестанас цергт мордсн болв хөөннь «Первомайский» эдл-ахуд ирәд 30 һар җилдән көдлҗәдг Магомед Халиков харһлтд орлцв. Валерий Астаевич «Первомайский» эдл-ахун көдләчнрин нерн деерәс Афганистанд церглҗ йовсн улст белг бәрүлҗ өгв. Адг селәнә муниципальн бүрдәцин толһач Очкан Эдуард нег һазра улсин залу-зөрмгин тускар келҗ, даалһвран үнн кевәр күцәснднь эднд ханлтан өргв. Ветеранмуд Афганистанд болсн дәәнд орлцсн цагиг тодлҗ, әмнәсн хаһцсн үүрмүдин санлынь тевчв. Баһ Дөрвдә района сойлын Герт Афганистанас советск цергиг һарһсна 35 җилин өөнд нерәдгдсн керг-үүлдвр бас болв. Терүнд таңһчин Улсин Хуралын депутат Амика Лиҗ, цергә даалһвр күцәҗ йовсн баһ дөрвдәхн Болдра Санл, Сергей Жагинов, Владимир Кадацкий, Мөңкнә Геннадий, Мукөвүнә Батыр, Муутла Валерий, Очра Николай болн Санҗин Юрий орлцв.

ДООҖАН Наталья
ЗУРГТ: Хар Һазра района Адг селәнд болсн харһлтын кем

Видео