Баһчудла харһв

20-02-2024, 13:25 | Общество

Таңһчин Улсин Хуралд «Шин улс» партин әңгин һардач Гаджи Фероян «Әрәсә» гидг һәәхүлд болсн «Баһчудын Әрәсә» керг-үүлдврт орлцв. Орннутгин олн зүсн марһаст, олна җисәнә үүлдврт шунмһаһар орлцдг оютнр болн сурһульчнр эврәннь төсвс үзүлв. Депутат Хальмг Таңһчин һәәхүлиг хәләһәд, таңһчин баһчудын керг-төрин агентствин һардач Камиль Маркеевла болн баһчудын ниицәсин элчнрлә күүндв.

Гаджи Фероян зака үүдәгч үүлдвриннь тускар хувалцад, баһчудыг дөңнлһнә, эдниг көдлмшәр тетклһнә, сурһуль сурч тааста эрдм дасч авлһна, билг-эрдм делгрүллһнә төрмүдт депутатнр ик оньг тусхаҗахиг темдглв. Нег үлү селән һазрт бәәдг баһчудыг дөңнхин туст немр керг-үүлдврмүд батлх кергтә гив. Хальмг Таңһчд селән һазрт сән таал тогталһна төлә баһ биш көдлмш күцәгдҗәнә, болв тер бийнь баһчуд төрскн һазртан көдлмш олҗ олзта-тустаһар үүлдхин туст нәрн төрмүд бәәнә. Эн төр хаһлхд «Кадры для села» гидг көтлвр баһчудт туслх гисн ицл бәәнә гиҗ депутат келв. Һәәхүлд орлцсн седвәртә баһчуд эврәннь үүлдврин тускар келҗ өгәд, үүмүлҗәдг төрмүдәрн хувалцв. Гаджи Фероян эднә төрмүдт орлцҗ дөң-тусан күргх болв. «Мана харһлт соньн болв. Мана баһчуд төрскнч седклтә, седвәртә улс мөн. Иим шунлтта баһчудла мана Әрәсән болн хальмг Таңһчин иргч эрк биш сәнсәәхн болх», - гиҗ депутат темдглв.

ДООҖАН Наталья

Видео